Sosial

Ana səhifə

Sosial

Azərbaycan Dövlət Sosial Müdafiə Fondunun gəlirləri və xərcləri artıb

28 yanvar 2011 10:02 (UTC +04:00)

Bakı. Vahab Rzayev - APA-Economics. Ötən il Azərbaycan Dövlət Sosial Müdafiə Fondunun (DSMF) gəlirləri 1 765,7 mln. manat təşkil edib ki, bu da əvvəlki illə müqayisədə 10,2% çoxdur.

“APA-Economics”in xəbərinə görə, bu barədə DSMF sədri Səlim Müslümov qurumun 2010-cu ilin yekunlarına həsr olunmuş Kollegiya iclasında bəyan edib.

Onun sözlərinə görə, məcburi dövlət sosial sığorta haqları üzrə daxilolmalar 2009-cu ilə nisbətən 7,7% artaraq 1 114,3 mln. manata çatıb. Qeyri-büdcə sektoru üzrə daxilolmalar 12,6% artaraq 648,8 mln. manat təşkil edib. Bu artım orta aylıq əmək haqqının artım tempini 3,5% faiz bəndi üstələyib ki, bu da sosial sığorta yığımları sahəsində aparılan işlərin müsbət nəticəsidir.

Fondun xərclərinə gəldikdə isə, bu göstərici 1 765,1 mln. manat təşkil edib ki, bu da 2009-cu illə müqayisədə 5,4% çoxdur.

S.Müslümov bildirib ki, 2010-cu ildə pensiya sahəsində aparılan artırma işləri nəticəsində əmək pensiyaların orta aylıq məbləği ilin əvvəlinə nisbətən 11,5% artaraq 112 manata çatıb. Eyni zamanda 2010-cu ilin yanvarın 1-dən “Əmək pensiyaları haqqında” qanuna edilən son əlavə və dəyişikliklərin tətbiqi nəticəsində yeni təyin olunan pensiyalar üzrə orta aylıq məbləğ 162 manata bərabər olub.

DSMF sədri bəyan edib ki, 2010-cu ildə iqtisadi böhranın təsirləri aradan qaldırılıb və işgüzar fəallıq bərpa olunub. Nəticədə əmək haqları və pensiyaların artımı baş verib.

Kollegiya iclasında “2009-2015-ci illərdə Azərbaycan Respublikasında sığorta-pensiya sisteminin inkişafına dair Dövlət Proqramı” ilə icrası 2011-ci il üçün nəzərdə tutulmuş tədbirlər müzakirə edilib. Müzakirə zamanı pensiya və müavinət təyinatının avtomatlaşdırılması, Fond sistemində vahid korporativ şəbəkənin qurulması və digər istiqamətlərdəki tədbirlərin daha da intensivləşdirilməsi barədə qərarlar qəbul olunub.