Sosial

Ana səhifə

Sosial

Əmək və Əhalinin Sosial Müdafiəsi Nazirliyində Gəncə şəhər Əhalinin Sosial Müdafiə Mərkəzi ilə canlı bağlantı yaradılıb

04 fevral 2011 12:07 (UTC +04:00)

Bakı. İlhamə İsabalayeva - APA-Economics. Bu gün əmək və əhalinin sosial müdafiəsi naziri Fizuli Ələkbərov nazirlikdə quraşdırılmış videokonfrans zalından Gəncə şəhər Əhalinin Sosial Müdafiə Mərkəzi ilə canlı bağlantı yaradıb.

“APA-Economics”in məlumatına görə, tədbirdə çıxış edən F.Ələkbərov deyib ki, belə müşavirənin respublikanın 6 regionunda keçirilməsi nəzərdə tutulur: “Müşavirənin əsas məqsədi odur ki, insanlarla görüşərək onları narahat edən problemləri onların özlərindən öyrənək. O zaman bizim atdığımız addımlar daha kəsərli və düzgün olacaq”.

F.Ələkbərov deyib ki, hazırda Naxçıvan, Gəncə və Göygölün Əhalinin Sosial Müdafiə Mərkəzləri ilə videobağlantı var. Bu ilin sonunadək respublikanın 39 rayonunda belə imkan yaradılacaq. Nazir videobağlantılar hesabına gələcəkdə bütün respublika üzrə müxtəlif məsələlərin yerində araşdırılma imkanının olacağını söyləyib.

ƏƏSMN-in İnformasiya Kommunikasiya Texnologiyaları Qrupunun rəhbəri Məmməd Aslanov deyib ki, 2006-cı ildən ƏƏSMN-in və Dünya Bankının dəstəyi ilə nazirliyin regional struktur bölmələrini əhatə edən korporativ hesablama şəbəkəsinin yaradılmasına başlanılıb. Hazırda nazirliyin korporativ şəbəkəsi respublikanın əksər bölgələrini əhatə edir. 2007-ci ildən nazirlik tərəfindən regional struktur bölmələri üçün tikilən yeni binalarda “vahid pəncərə” prinsipi üzrə yerli struktur bölmələrinin yerləşdirilməsi və onların əlaqəli fəaliyyətinin təşkili nəzərdə tutulub.

Binaların layihəsində daxili kompüter şəbəkəsi və korporativ şəbəkəyə çıxışlar, binalarda yerləşmiş struktur bölmələrinin hər birinin korporativ şəbəkəyə qoşulması təmin olunub. 2010-cu ildən DB və ƏƏSMN-in birgə həyata keçirdiyi “Sosial Müdafiənin İnkişafı” Layihəsi çərçivəsində Nazirliyin İKT potensialının artırılması məqsədi ilə mərkəzi aparatın və struktur bölmələrinin kompüter və digər texniki avadanlıqlarla təmin olunması, server avadanlıqları sisteminin yeni tələblərə uyğun genişləndirilməsi, sənəd dövriyyəsinin və büdcənin formalaşmasının avtomatlaşdırılması, korporativ şəbəkənin potensialının artırılması, videokonfrans sisteminin yaradılması və s. istiqamətlərdə işlərə başlanıb. Əldə olunan effektiv nəticələr əsasında video konfransların, distans təlimlərin, həmçinin distans qəbul prosesinin keçirilməsinə şərait yaranıb.

Daha sonra nazir videobağlantı ilə 9 şikayətçinin problemini dinləyib. O, yerlərdə Əhalinin Sosial Müdafiəsi Mərkəzlərinə, eləcə də nazirliyin digər yerli strukturlarına müraciət edən insanların müraciətlərinə diqqətlə yanaşılmasını, onların sorğularına vaxtlı-vaxtında cavab verilməsini, ərizə və şikayətlərinin ciddi şəkildə araşdırılmasını tapşırıb.