Sosial

Ana səhifə

Sosial

“Azərikimya” İB-də tikinti-inşaat mütəxəssislərinin işə qəbulu üzrə test imtahanı keçirilib

04 fevral 2011 16:49 (UTC +04:00)

Bakı - APA-Economics. “Azərikimya” İB-nin mövcud istehsalat sahələrində və yaxın dövrlərdə tikintisi nəzərdə tutulmuş yeni, daha müasir qurğu və obyektlərin inşaat işlərində çalışmaq üçün bacarıqlı inşaatçı-mühəndislərin və ixtisaslı fəhlələrin işə qəbulu üzrə test-sınaq imtahanı keçirilib.
ARDNŞ-dan “APA-Economics”ə verilən məlumata görə, öz bilik və bacarıqlarını, tapşırılacaq işin öhdəsindən layiqincə gələ biləcəklərini sübut etmək üçün test imtahanında 30–a qədər gənc mütəxəssis, o cümlədən bu sahədə müəyyən iş təcrübəsinə malik mühəndis və fəhlələr də iştirak ediblər.
Sosial-məişət şəraitinin son dövrlərdə xeyli yaxşılaşdığı, kimyaçılara göstərilən diqqət və qayğının daha da artdığı “Azərikimya”da işləmək arzusunda olanların hər biri Birliyin yüksək ixtisaslı mütəxəssisləri tərəfindən tərtib olunmuş test suallarına cavab verməli olublar.
Qeyd etmək lazımdır ki, kimya istehsalatının inşaat sahəsində çalışmaq istəyində olanlar arasında ali məktəbi bir-neçə il əvvəl bitirmiş gənclərlə yanaşı 10-15 illik iş təcrübəsinə malik mütəxəssislər də iştirak ediblər. Biletlərdəki suallara 25 dəqiqə ayrılmasına baxmayaraq, iddiaçılar arasında həm nəzəri, həm də təcrübi cəhətdən hazırlıqlı olanlar daha çox suala cavab verməklə 15-20 dəqiqə ərzində biletləri imtahan komissiyasına təhvil veriblər.
İşə qəbul üzrə komissiyanın sədri, “Azərikimya” İstehsalat Birliyinin İcraçı direktorunun kadr, rejim və informasiya texnologiyaları üzrə müavini Xalıq Mustafayevin, təmir və tikinti məsələləri üzrə müavin Sərvər Ağayevin imtahan başlamazdan əvvəl iddiaçılar qarşısında çıxış edərək bildirdiklərinə görə test-imtahanın nəticələrindən asılı olaraq ilk növbədə bilet suallarına daha düzgün və dəqiq cavab verərək, ən yüksək bal toplamış mütəxəssis və fəhlələr işə qəbul olunacaq, digər müsbət nəticə göstərmiş iddiaçılar isə yaxın gələcəkdə “Azərikimya”nın müəssisə və istehsalatlarında yenidənqurma və müasirləşdirmə işlərinin genişləndiriləcəyi mərhələ üçün Birliyin ehtiyat işçi fonduna daxil ediləcəklər.