Sosial

Ana səhifə

Sosial

Ötən il Konstitusiya Məhkəməsində görülmüş işlər və qarşıda duran vəzifələr müzakirə edilib

04 fevral 2011 19:09 (UTC +04:00)

Bakı-APA. Fevralın 4-də Fərhad Abdullayevin sədrliyi ilə Azərbaycan Respublikası Konstitusiya Məhkəməsində aparatın 2010-cu ildə fəaliyyətinin yekunlarına həsr olunmuş hesabat iclası keçirilib. Bu barədə APA “Azərtac”a istinadən məlumat verir.

İclasda ötən il məhkəməyə daxil olmuş müraciətlər, sorğular və vətəndaşların şikayətləri ilə bağlı qəbul edilmiş qərar və qərardadlar barədə, habelə aparılmış təhlillər, analitik rəylər və arayışlar, Konstitusiya Məhkəməsinin beynəlxalq əməkdaşlıq sahəsində fəaliyyəti məsələləri müzakirə edilib.

Aparatın müvafiq şöbələri və sektorlarının müdirlərinin hesabatları, aparatın rəhbər şəxslərinin çıxışları dinlənilib.

İclasda hesabat ilində Konstitusiya Məhkəməsinə müraciət hüququndan istifadə edən subyektlər tərəfindən qanunvericilikdə mövcud olan ziddiyyətli məqamlarla bağlı hüquq tətbiqetmə təcrübəsinin təkmilləşdirilməsinə və bir sıra vacib hüquqi məsələlərə aid daxil olmuş müraciətlər və sorğular barədə məlumat verilib.

Ötən il məhkəmələrdən daxil olmuş müraciətlər əsasında Konstitusiya Məhkəməsi Plenumunun 8 qərar qəbul etdiyi, hazırda bəzi müraciətlərin icraata qəbul olunmasının mümkünlüyü baxımından öyrənildiyi, ümumilikdə isə hesabat dövründə daxil olmuş sorğu, müraciət və şikayətlər əsasında Konstitusiya Məhkəməsinin Plenumu tərəfindən 20 qərar və 6 qərardad qəbul edildiyi diqqətə çatdırılıb. Həmin qərarlarda hüquqi cəhətdən bir sıra ziddiyyətli məsələlərə və hüququn tətbiqində yaranan kolliziyalara ətraflı şərhlər və tövsiyələr verilib.

Konstitusiya Məhkəməsinin sədri ötən il beynəlxalq əməkdaşlıq sahəsində həyata keçirilən tədbirlərdən danışaraq deyib ki, Azərbaycan Respublikası Konstitusiyasının 15 illiyinə həsr olunmuş beynəlxalq konfrans yüksək səviyyədə keçirilib. Fərhad Abdullayev beynəlxalq konstitusiya nəzarəti orqanlarının təcrübəsinin Konstitusiya Məhkəməsinin fəaliyyəti və ölkəmizin hüquq ictimaiyyəti üçün əhəmiyyətindən geniş şəkildə danışıb.

Sonra aparatın işçi qrupunun hesabat dövründəki fəaliyyəti, Konstitusiya Məhkəməsi sədrinin və hakimlərinin müvafiq tapşırıqları ilə rəylərin hazırlanması, qanunvericilikdə mövcud boşluqların və ziddiyyətlərin aşkar olunması sahəsindəki işi müsbət qiymətləndirilmiş, struktur rəhbərləri qarşısında bir sıra vəzifələr qoyulub.

Fərhad Abdullayev, həmçinin yanvarın 27-də Prezident Administrasiyasında Azərbaycan Respublikasının Korrupsiyaya Qarşı Mübarizə üzrə Komissiyasının iclasında dövlət orqanları qarşısında qoyulmuş tələblər və verilmiş təlimatları qeyd edib, vətəndaşların şikayət və ərizələrinin, habelə məhkəmələrdən daxil olan müraciətlərin daha da diqqətlə öyrənilməsi, məhkəmə hakimiyyətinə vətəndaşların etibarının artırılması, şikayətlərdə məhkəmə orqanlarına aid olan nöqsanların aradan qaldırılması üçün lazımi tədbirlərin görülməsi barədə müvafiq tapşırıqlar verib.