Sosial

Ana səhifə

Sosial

Ötən ay Təhsil Nazirliyinin “Qaynar xətt”nə edilən müraciətlərin əksəriyyəti buraxılış imtahanları ilə bağlı olub

08 iyul 2011 10:12 (UTC +04:00)

Bakı. Sevil Zeynalqızı - APA. Bu ilin iyun ayında Təhsil Nazirliyinin “Qaynar xətt” xidmətinə 4781 müraciət daxil olub. Nazirliyin mətbuat xidmətindən APA-ya verilən məlumata görə, müraciətlərin 4097-si telefonla, 684-ü elektron poçt vasitəsilə qəbul edilib. Onların böyük əksəriyyəti sorğu xarakterli olub. Sorğuların 4000-dən çoxu 9 və 11-ci siniflərdə buraxılış imtahanlarının təşkili və keçirilmə qaydaları, imtahan nəticələrinin öyrənilməsi, şəhadətnamə və attestatların verilməsi, imtahan nəticələri ilə əlaqədar apellyasiya şikayətlərinin nəticələri il bağlı olub. Digər sorğularda müəllimlərin müsabiqə yolu ilə işə qəbulu, növbəti dərs ilindən müəllimlərin dərs yükü normaları, onların yaş senzi, istedadlı uşaqlar arasında keçirilmiş olimpiadanın nəticələri və beynəlxalq olimpiada qaliblərinə verilən güzəştlər, xaricdə təhsil, xarici ölkələrin təhsil müəssisələrindən verilmiş təhsil sənədlərinin tanınması və digər məsələlər öz əksini tapıb. Bir sıra müraciətlərdə isə məktəbəqədər, ümumtəhsil, texniki-peşə, orta-ixtisas və ali təhsil müəssisələrindəki problemlərdən bəhs olunub. Məlumatda bildirilir ki, 84 belə müraciət əsasında araşdırmalar aparılıb və problemlərin aradan qaldırılması istiqamətində tədbirlər həyata keçirilib.

Ötən ay “Qaynar xətt”ə daxil olan şikayət məzmunlu müraciətlərin 15-i Bakı, 4-ü Gəncə, 1-i Sumqayıt şəhərlərindən, 5-i Abşeron, 3-ü Cəlilabad, hər birindən 1 müraciət olmaqla Yardımlı, Biləsuvar, Qubadlı, Daşkəsən, Salyan və Ağcabədi rayon ümumtəhsil məktəbləri ilə əlaqədar olub. Müraciətlərdə ümumtəhsil məktəblərində şagirdlərin illik qiymətlərinin çıxarılması, təhsil sənədlərinin məzunlara verilməsi sahəsində çatışmazlıqlar, məktəb rəhbərlərinin yol verdikləri nöqsanlar və digər məsələlər əksini tapıb.
“Qaynar xətt”ə texniki-peşə təhsili müəssisələri ilə əlaqədar 3 müraciət daxil olub. Məktəbəqədər tərbiyə müəssisələri ilə əlaqədar 11 şikayət məzmunlu müraciət edilib. 2010-2011-ci dərs ilinin yay imtahan sessiyası dövründə “Qaynar xətt” tərəfindən ali və orta ixtisas təhsili müəssisələrindən 46 müraciət qəbul edilib. Onlardan 19-u dövlət, 9-u özəl ali təhsil, 3-ü xarici ölkələrin ali məktəbləri, 14-ü orta ixtisas təhsili müəssisələri ilə əlaqədar olub. Müraciətlər ali məktəblərdə Boloniya sisteminin tətbiqi, tələbələrin semestr və dövlət imtahanlarına buraxılması, təhsil haqqının ödənilməsi qaydaları, təqaüdlərin gecikdirilməsi və digər mövzuları əhatə edib.
İmtahan sessiyasının gedişi ilə əlaqədar Azərbaycan Müəllimlər İnstitutunun Zaqatala, Şəki, Quba, Gəncə filialları, Azərbaycan Dövlət İqtisad Universiteti, Gəncə Dövlət Universiteti, Bakı Dövlət Universiteti, Azərbaycan Texnologiya Universiteti, Azərbaycan Turizm Universiteti, Sumqayıt Dövlət Universiteti və digər ali təhsil müəssisələrindən daxil olan müraciətlərdə tələbələr daha çox aldıqları qiymətlərdən narazılıqlarını bildirib, apellyasiya qaydasında qiymətlərinin yüksəldilməsinə köməklik göstərilməsini xahiş ediblər. Bununla əlaqədar nazirliyin müvafiq qurumlarının əməkdaşları müraciət daxil olmuş ali təhsil müəssisələrinin və QHT-lərin nümayəndələri ilə birgə araşdırmalar aparıb.
Özəl ali təhsil müəssisələrindən daxil olan müraciətlər Təfəkkür, Odlar Yurdu, Qafqaz Universitetləri, İctimai-Siyasi Universitet, Avrasiya Universiteti və fəaliyyəti dayandırılmış Azərbaycan Beynəlxalq Universiteti ilə əlaqədar olub. Orta ixtisas təhsil müəssisələri ilə əlaqədar Azərbaycan Dövlət Pedaqoji Kolleci, Şəki Pedaqoji Kolleci, Bakı Qida Sənayesi Kolleci, Bakı Humanitar Kolleci, Şuşa Humanitar Kolleci, 2 nömrəli Bakı Baza Tibb Kolleci, Bakı Dövlət Sosial İqtisadi Kolleci, Qazax Dövlət Sosial İqtisadi Kolleci və Gəncə Musiqi Kollecindən müraciətlər daxil olub.

qaynar xətt _ təhsil