Sosial

Ana səhifə

Sosial

Daxili Qoşunların mətbuat xidməti Hacıqabulda hərbi şəhərcikdə yaşayan ehtiyatda olan zabitlərin evinin qanunsuz sökülməsi barədə məlumatlara münasibət bildirib

14 iyul 2011 12:59 (UTC +04:00)

Bakı. Rəşad Süleymanov – APA. Azərbaycan Daxili İşlər Nazirliyinin Daxili Qoşunların (DQ) mətbuat xidməti Hacıqabul şəhərindəki hərbi şəhərcikdə yaşayan ehtiyatda olan iki zabitin evinin qeyri-qanuni sökülməsi ilə bağlı yayılan məlumatlara münasibət bildirib. Daxili Qoşunların mətbuat xidmətinin rəisi, polkovnik-leytenant Təranə Məmmədova APA-ya bildirib ki, Hacıqabul şəhərində yerləşən “N” saylı hərbi hissəsinin ərazisindəki hərbi şəhərcikdə yaşayan Bəxtiyar Yusif oğlu Vəkilov və Ədalət Səttar oğlu Qənbərovun yaşadıqları mənzildən qeyri-qanuni çıxarılması barədə ötən gün kütləvi informasiya vasitələrində qərəzli və həqiqətə uyğun olmayan məlumat yerləşdirilib.

T. Məmmədova bildirib ki, Azərbaycan Prezidentinin 280 saylı 31 may 1992-ci il tarixli sərəncamı ilə sabiq aviasiya polkunun əraziləri DİN-in Daxili Qoşunlarının Hacıqabulda yerləşən operativ idarəsinin balansına verilib: “Hərbi şəhərcikdə 1952-ci ildə tikilmiş fin evlərinin qəzalı vəziyyətdə olmaları nəzərə alınaraq onların sökülməsi, bununla əlaqədar ərazidə yenidənqurma və abadlıq işlərinin aparılması planlaşdırılıb. Həmin ərazidə əsgərlər üçün yeni yaşayış kazarmalarının tikilməsi nəzərdə tutulur. Bu səbəbdən də hərbi şəhərcikdə qeyri-qanuni yaşayan vətəndaşlar çıxarılıb, qanuni yaşayan vətəndaşlar isə hərbi şəhərcikdə olan 2 və 5 mərtəbəli binalarda yerləşdirilib. Şəhərcikdə qəza vəziyyətində olan həmin binalar hərbçi ailələrinə müvəqqəti yaşayış kimi verilib, bəzi mənzillər isə məcburi köçkünlər və digər vətəndaşlar tərəfindən müxtəlif vaxtlarda qeyri qanuni olaraq tutulub”. T. Məmmədovanın sözlərinə görə, Ədalət Qənbərova 18.07.1991-ci il tarixli 037765 nömrəli orderə əsasən hərbi şəhərcikdə 12 saylı binada 7 nömrəli, 3 otaqlı mənzil, Bəxtiyar Vəkilov isə 17.05.1991-ci il tarixli 037703 nömrəli Müdafiə Nazirliyinin Salyan Mənzil istismar hissəsi tərəfindən 7 nömrəli fin evində 4 otaqlı mənzil verilib: «Söküntü işləri ilə əlaqədar olaraq mənzil qanunvericiliyinin tələblərinə əsasən Bəxtiyar Vəkilova ailə üzvləri ilə birgə digər yaşayış sahəsinin təklif olunmasına baxmayaraq, o, bundan imtina edir və qəza vəziyyətində olan binadan çıxmayacağını bildirir. Ədalət Qənbərova Salyan rayon Mənzil İstismar Sahəsi tərəfindən verilmiş 15 gün müddətində qüvvədə olan order onun qardaşı Qənbərov Mehman Səttar oğlunun adınadır. O isə Azərbaycanın sərhədlərindən kənarda yaşayır. Eyni zamanda Ədalət Qənbərovun adına Hacıqabul şəhəri, 20 yanvar küçəsi, dalan 3-də 6 sot torpaq sahəsində inşa edilmiş 6 otaqdan ibarət 29 nömrəli ev də olub. O həmin mənzili 11 yanvar 2003-cü il tarixdə satıb. Ədalət Qənbərov da müxtəlif bəhanələrlə digər təklif olunan mənzilə köçməkdən imtina edir».

Qısa müddət ərzində hərbi hissənin zabitləri üçün yeni xidməti mənzillər istifadəyə veriləcəyini deyən T. Məmmədova Ə.Qənbərov və B.Vəkilova hətta boşalan binadan belə, istədikləri mənzili seçmək hüququ verildiyini də qeyd edib: «Hər iki vətəndaşın tələbləri tamamilə əsassızdır və qanunvericiliyin tələblərinə ziddir. Bu məsələ ilə bağlı qəzalı mənzilləri tərk etməyən iddiaçıların bir neçə məhkəmədə müraciətlərinə baxılıb və qanun çərçivəsində qərar qəbul olunub».

Daxili Qoşunlar