Sosial

Ana səhifə

Sosial

Qarabağ müharibəsi veteranlarının təsnifatlaşdırılması ilə bağlı ictimai dinləmələr keçiriləcək

16 iyul 2011 10:23 (UTC +04:00)

Bakı. Rəşad Süleymanov - APA-Economics. Qarabağ müharibəsi veteranlarının təsnifatlaşdırılması ilə əlaqədar parlamentin payız sessiyası çərçivəsində Milli Məclis üzvlərinin və müvafiq qurumların nümayəndələrinin iştirakı ilə ictimai dinləmələrin keçirilməsi planlaşdırılır. Bu barədə “APA-Economics”ə Milli Məclisin Sosial siyasət komitəsinin sədri müavini Musa Quliyev məlumat verib.

Onun sözlərinə görə, bu sahədə mövcud problemlər və qanunvericiliyə hansı dəyişikliklərin edilməsi öyrəniləcək. Bundan sonra müvafiq qanunlara bununla bağlı əlavə və dəyişikliklər olunacaq.

Millət vəkili müharibə veteranlarının təsnifatlaşdırılması məsələsinə hərbi qurumların münasibətinin normal olduğunu söyləyib: «Bir neçə il əvvəl veteranların yenidən qeydiyyata alınması üçün Müdafiə, Daxili İşlər, Milli Təhlükəsizlik, Əmək və Əhalinin Sosial Müdafiəsi nazirliklərinin təmsil olunduğu hökumət komissiyası yaradılıb. Adı çəkilən qurumlar bu işlə məşğuldurlar. Amma bildiyimə görə, onların verdiyi təsnifata cəmiyyətin müəyyən iradları var».

Qeyd edək ki, Qarabağ müharibəsi veteranlarının təsnifatlaşmasında bir neçə meyarın əsas götürüləcəyi bildirilir. Məsələn, döyüşlərdə daha çox olmuş insanlarla qısa müddətə - bir neçə günlüyə döyüş bölgəsinə ezam olunmuş, həmçinin bilavasitə döyüş əməliyyatlarına qatılmamış, lakin müharibə bölgəsindən insanların təxliyəsində iştirak etmiş şəxslərin statuslarında müəyyən fərqlər olacaq.