Sosial

Ana səhifə

Sosial

Dənizkənarı Bulvar İdarəsi bulvardakı qiymətlərin baha olmasına münasibət bildirib

07 sentyabr 2011 12:19 (UTC +04:00)

Bakı. Əli Əhmədov - APA-Economics. «Dənizkənarı Bulvardakı xidmətlərin qiyməti bazar iqtisadiyyatına uyğun olaraq sahibkarlar tərəfindən müəyyənləşdirilir. Amma bu qiymətlərdən narazı olanlar idarənin qaynar xəttinə müraciət edə bilər». «APA-Economics»in məlumatına görə, bu barədə Azərbaycan Nazirlər Kabineti yanında Dənizkənarı Bulvar İdarəsinin rəis müavini Nazim Məcidov Milli Parkda bəzi xidmətlərin və buradakı iaşə obyektlərində satılan ərzaq mallarının qiymətinin baha olması ilə bağlı sualı cavablandırarkən bildirib.

Azərbaycanda yalnız bəzi malların qiymətinin Tarif Şurası tərəfindən müəyyənləş¬diril¬diyini xatırladan rəis müavini deyib ki, digər məhsullar, o cümlədən yeyinti məhsulları, attraksion və karusellərin qiyməti bazarda tənzimlənir: «Yəni bazar iqtisadiyyatı olduğu üçün orda dövlət tərəfindən rəsmi qiymət qoyulmur, onları sahibkarlar müəyyənləşdirirlər».

N.Məcidovun sözlərinə görə, hər bir kafe, restoran, köşk, eləcə də karusel və attraksionda qiymətlər göstərilib: «Orda bahalı və ucuz mallar var. Attraksionların qiyməti isə 1-5 manat arasındadır. Bu qiymətləri də sahibkarlar həmin avadanlıqların saxlanması xərci və enerji qiymətinə görə qoyublar. Amma kimsə 30 qəpiklik dondurmanı 2 manata satırsa, bu insan faktorudur, yəni qazanc məqsədilə insanları aldatmaqdır».

Qiymətlərin yüksək olması ilə bağlı şikayətlərin daim olduğunu etiraf edən rəis müavini qeyd edib ki, narazı şəxslər idarənin qaynar xəttinə müraciət edə bilərlər: «Hər yerdə bizim qaynar xəttin nömrəsi göstərilib (012-480-18-36, 055-282-70-00). Bu nömrələrə zəng edərək insanlar öz şikayətlərini, iradlarını bildirə bilərlər və bildirirlər də».

Bununla yanaşı, N.Məcidov əlavə edib ki, yay mövsümü başlayandan indiyədək bulvarda 4 dəfə pulsuz karusellər aksiyası keçirilib, yaşı 15-dək olan uşaqlar yarım gün ərzində istənilən karusel və attraksiondan pulsuz istifadə ediblər.