Sosial

Ana səhifə

Sosial

Azərbaycanda “Yaşlaşma üzrə Madrid Beynəlxalq Fəaliyyət Planı”dan irəli gələn vəzifələrin icrası ilə bağlı hesabat hazırlanır

12 sentyabr 2011 15:12 (UTC +04:00)

Bakı. Sevil Zeynalqızı-APA. Bu gün Əmək və Əhalinin Sosial Müdafiəsi Nazirliyində (ƏƏSMN) BMT-nin Əhali Fondu və BMT-nin Yaşlaşma üzrə Beynəlxalq İnstitutu ilə birgə “Əhalinin yaşlaşması sahəsində siyasətin formalaşdırılması, planlaşdırılması, həyata keçirilməsi və “Yaşlaşma üzrə Madrid Beynəlxalq Fəaliyyət Planı” mövzusunda treninq kurs keçirilib. APA-nın məlumatına görə, sentyabrın 17-dək davam edəcək seminarda sosial siyasət, əhalinin yaşlaşma prosesi və onun nəticələri, bu istiqamət üzrə ölkənin inkişafı üçün müvafiq siyasətlərin və proqramların formalaşması, yaşlaşma sahəsində milli potensial və sair məsələlər müzakirə ediləcək.

Seminarda çıxış edən ƏƏSMN-nin Aparat rəhbərinin müavini Elnur Kələntərli bildirib ki, Azərbaycanda orta ömür uzunluğu artıb: “Belə ki, 1990-1995-ci illərdə əhalinin orta ömür uzunluğu göstəricisi 71 yaşdan 69 yaşadək azaldığı halda, ötən il dOğulan körpələr üçün gözlənilən ömür uzunluğu 74 yaş, o cümlədən oğlanlar üçün 71, qızlar üçün 76 yaş təşkil edib”.

E. Kələntərlinin sözlərinə görə, 2012-ci ildə Praqada BMT tərəfindən “Yaşlaşma üzrə Madrid Beynəlxalq Fəaliyyət Planı”nın həyata keçirilməsinin 10-cu ildönümü ilə əlaqədar Qlobal konfrans keçiriləcək. Həmin tədbirdə beynəlxalq və regional ölkələr səviyyəsində yaşlı insanlara dair müvafiq siyasətlərin həyata keçirilməsi ilə bağlı müzakirələr aparılacaq. E. Kələntərli həmin plandan irəli gələn vəzifələrin icrası ilə bağlı ölkə hesabatının hazırlandığını deyib.