Sosial

Ana səhifə

Sosial

Ekspert: «Azərbaycanda əhalinin dərman xərcləri 20-30% artıb»

13 sentyabr 2011 13:20 (UTC +04:00)

Bu barədə «APA-Economics»ə açıqlamasında ölkənin ən iri aptek şəbəkələrindən biri olan «Avis» Tibbi Marketlər Şəbəkəsinin nümayəndəsi Murad Malikov bildirib: «Təcrübə göstərir ki, apteklərə daxil olan reseptlərin orta məbləği 20-50 manat arasındadır. Bundan az və ya yüksək məbləğli reseptlər də yazılır, amma əsas hissə 20-50 manatlıqdır».

Şirkət nümayəndəsinin sözlərinə görə, hazırda ən çox ağrıkəsicilərə və xəstəliyi olan insanların daimi istifadə etdiyi dərmanlara tələbat var: «Məsələn, diabetdən əzəiyyət çəkənlərin şəkərin azaldılması və ya tənzimlənməsi ilə bağlı dərmanlar və ya damar genişlənməsi olanlar buna qarşı dərmanlardan istifadə edirlər. Mövsümlə əlaqədar olaraq allergiya, əməliyyat sonrası bərpa üçün preparatlardan geniş istifadə olunur. Bundan başqa, son illər stressə qarşı preparatlara tələbat artıb».

Ekspertin fikrincə, hazırda dərmanlara etibar edilməsinə görə alıcılar şərti olaraq iki qrupa bölünür. Nisbətən yaşlı əhali, sovet dövrünün adamları postsovet ölkələrinin – Rusiya, Ukrayna, Belarus istehsalı olan dərmanlara etibar edir. Gənc və orta yaşlılar isə Qərbi Avropa və digər xarici ölkələrin dərmanlarına üstünlük verirlər. Uzaq xaricdən idxal olunan preparatlar arasında isə ən ucuzları Hindistandan gətirilir.

M.Malikv vurğulayıb ki, son illər ölkədə əhalinin alıcılıq qabiliyyətinin artması nəticəsində insanlar sağlamlığa daha diqqətlə yanaşmağa və pul xərcləməyə bağlayıblar: «Hesablamalarımıza görə, təkcə son 1 ildə bu sahədə 20-30% artım var».

İnsanlar daha aktiv həyat tərzinə keçdiyinə görə, hazır dərmanlara, o cümlədən avtomobildə istifadə oluna bilən, eləcə də çantada və cibdə gəzdirilə bilən formalarına tələbat artıb: «Çünki insanların bir yerdə oturub dərman qəbul etməyə də vaxtı yoxdur».