Sosial

Ana səhifə

Sosial

Azərbaycan və Portuqaliya gənclər sahəsində əməkdaşlığı möhkəmləndirir

16 sentyabr 2011 13:02 (UTC +04:00)

Bakı – APA. Gənclər və İdman Nazirliyinin əməkdaşlarından, yerli gənclər və idman idarələrinin rəislərindən və BMT-nin Uşaq Fondunun (UNİCEF) nümayəndələrindən ibarət heyət (cəmi 13 nəfər) gənclər və idman nazirinin müavini İntiqam Babayevin rəhbərliyi ilə Portuqaliyada səfərdə olub.

Nazirliyin mətbuat xidmətindən APA-ya verilən məlumata görə, məqsədi iki ölkə arasında gənclərlə iş sahəsində əlaqələrin qurulması və Portuqaliyada fəaliyyət göstərən gənclər mərkəzlərinin təcrübəsi ilə tanışlıq olan səfərin ilk günü Portuqaliyanın Gənclər İnstitutunun prezidenti, xanım Helena Alves ilə görüş keçirilib.

Xanım Alves Gənclər İnstitutunun strukturu və fəaliyyəti haqqında geniş məlumat verib. İnstitutun bir neçə məsul işçisi Azərbaycan nümayəndə heyətini Portuqaliyada dövlət gənclər siyasətini formalaşdıran və dövlət qurumu olan Gənclər İnstitutu tərəfindən icra edilən layihə və proqramlarla tanış edib, gənclər ictimai təşkilatlarına dəstək, gənclər üçün könüllülük proqramı, gənclər arasında sağlam həyat tərzinin təbliğ edilməsi, gənclər parlamenti, gənclərin asudə vaxtının təşkili haqqında məlumatlar verilib.

Lissabon şəhərində fəaliyyət göstərən və Gənclər İnstitutunun nəzdində olan Gənclər Mərkəzinə də səfər təşkil olunub. Gənclər Mərkəzinin strukturu və fəaliyyəti haqqında məlumat verilib, burada gənclərə göstərilən xidmətlər nümayiş etdirilib. Lissabon mərkəzində Gənclər Təşkilatlarının Milli Şurasının sədri ilə görüş keçirilib. Həmin gün İdman İnstitutunun prezidenti Avqusto Baqanya və onun müavini Mario Tekseyra ilə görüş keçirilib. Görüşdə idmanın gənclərin inkişafında əhəmiyyətindən və iki ölkə arasında idman sahəsində əməkdaşlıq haqqında söhbət aparılıb.

Bundan sonra İmmiqrasiya və Mədəniyyətlərarası Dialoq üzrə Ali Komissarlığının aparatının rəhbəri Duarte Mendes və bu təşkilatın nəzdində gənclərin həssas qruplarının cəmiyyətə inteqrasiyası məqsədilə fəaliyyət göstərən “Seçim” proqramının direktoru Pedro Kalado ilə görüş keçirilib. Günün axırında Portuqaliyanın UNİCEF-in Milli Komitəsinin icraçı direktoru xanım Madalena Marsal Qrilo ilə görüş olub.

Nümayəndə heyəti Portuqaliyanın şimalında yerləşən Tondela şəhərinə də səfər edib. Tondela şəhərinin vitse-meri Joze Antonio ilə görüş keçirilib və bu vilayətdə həyata keçirilən gənclər siyasəti haqqında söhbət aparılıb. Həmçinin Gənclər İnstitutunun regional direktoru Miqel Naşimento nümayəndə heyətini gənclərə aid olan infrastrukturla tanış edib.

Səfərin sonuncu günündə nümayəndə heyəti Portuqaliyanın Gənclər və İdman Katibi (nazir) Alexandre Miqel Mestre tərəfindən qəbul olunub. Görüş zamanı Azərbaycanın gənclər siyasəti haqqında məlumat verilib, gənclərlə iş və idman sahələrində ikitərəfli əməkdaşlığın genişləndirilməsi perspektivləri müzakirə olunub.