Sosial

Ana səhifə

Sosial

Azərbaycanın əmək və əhalinin sosial müdafiəsi naziri beynəlxalq ekspertlərdən ibarət nümayəndə heyətini qəbul edib

16 sentyabr 2011 15:56 (UTC +04:00)

Bakı. Sevil Zeynalqızı - APA-Economics. Əmək və əhalinin sosial müdafiəsi naziri Füzuli Ələkbərov bu gün “Əhalinin yaşlaşması sahəsində siyasətin formalaşdırılması, planlaşdırılması, həyata keçirilməsi və Yaşlaşma üzrə Madrid Beynəlxalq Fəaliyyət Planının monitorinqi” mövzusunda sentyabrın 2-16-da Bakıda keçirilən beynəlxalq treninq kursuna cəlb olunmuş beynəlxalq ekspertlərdən ibarət nümayəndə heyətini qəbul edib.

Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, görüşdə nazir Azərbaycanda ahıl vətəndaşların hüquqlarının qorunması, onların sosial müdafiəsinin gücləndirilməsi, bu sahədə qanunvericiliyin beynəlxalq normalara uyğunlaşdırılmasının prioritet istiqamətlərdən biri olduğunu, bu istiqamətdə son on ildə bu istiqamətdə mühüm işlərin görüldüyünü bildirib.

F.Ələkbərov deyib ki, nazirliyin nəzdində fəaliyyət göstərən Müharibə və əmək əlilləri üçün Pansionatda tam dövlət təminatında ahıl vətəndaşlar yaşayır. O, yaxın vaxtlarda həmin pansionatın təmir edilərək beynəlxalq standartlara uyğunlaşdırılacağını söyləyib. Dünya ölkələrinin çoxunda olduğu kimi, Azərbaycanda da əhalinin yaşlaşma prosesinin müşahidə olunduğunu deyən nazir 1950-2010-cu illər ərzində 65 yaşından yuxarı olan əhali kontingentinin sayının dünya üzrə 5%-dən 8%-ə qədər, 2050-ci il üçün isə 16%-ə qədər, Azərbaycan üçün isə bu göstəricinin 2010-cu ildəki 6%-dən 2050-ci ilədək 12%-ə qədər artacağını bildirib.

Beynəlxalq ekspertlər qrupuna rəhbərlik edən BMT-nin Maltada yerləşən Yaşlaşma üzrə Beynəlxalq İnstitutunun direktoru və Malta Universitetinin Gerontologiya üzrə Avropa Mərkəzinin direktoru Jozef Troisi Azərbaycanı qarşısında duran problemlərin öhdəsindən gəlmək iqtidarında olan bir güclü ölkə kimi dəyərləndirib. O bildirib ki, Azərbaycan müstəqillik əldə etdiyi bu illər ərzində öndə gedən ölkələrdən birinə çevrilib. J.Troisi təmsil etdiyi qurumun Azərbaycan ilə beynəlxalq səviyyədə əməkdaşlıq etməyə, əldə etdikləri beynəlxalq təcrübəni azərbaycanlı mütəxəssislər ilə bölüşməyə hazır olduqlarını deyib.