Sosial

Ana səhifə

Sosial

Moskva Dövlət Universitetinin Bakı filialı tələbələrinin “Azərikimya” müəssisələrində istehsalat təcrübəsi başa çatıb

16 sentyabr 2011 17:49 (UTC +04:00)

Bakı-APA. ARDNŞ-in “Azərikimya” İstehsalat Birliyinin baş ofisində sentyabrın əvvəlindən başlayaraq kimya müəssisələrində istehsalat təcrübəsi keçmiş M.Lomonosov adına Moskva Dövlət Universiteti Bakı filialının kimya fakültəsinin müəllim və tələbələri ilə hesabat görüşü keçirilib.
Tədbirdə ali təhsil ocağı tələbələrinin hər biri kurs işi olaraq götürdükləri mövzuya və keçdikləri təcrübəyə uyğun olaraq qazandıqları təcrübi bilik və istehsalat təəssüratları ilə bağlı fikirlərini söyləyiblər. Gələcək mütəxəssislər kimi onların iki həftə ərzindəki əldə etdikləri praktik vərdişlər, qazandıqları istehsalat təcrübəsi ilə bağlı araşdırma və müzakirələr aparılmış, onların piroqazın sıxılması və rektifikasiyası, izopropil spirti, yüksək təzyiqli polietilen, propilen oksidi istehsalı və s. üzrə hazırladıqları kurs işləri Birliyin aparıcı mütəxəssisləri tərəfindən müsbət qiymətləndirilib.
Görüşdə “Azərikimya” İstehsalat Birliyi kollektivinin respublikamızın kimyaçı kadrlar hazırlayan bir sıra ali təhsil müəssisələri - Bakı Dövlət Universiteti, Azərbaycan Dövlət Neft Akademiyası, Qafqaz Universiteti və digər ali təhsil ocaqları ilə sıx əlaqələr yaratması, son vaxtlarda isə Moskva Dövlət Universitetinin Bakı filialının da ali təhsil mərkəzi kimi bu partnyorlar sırasında olması yüksək dəyərləndirilib, «Universitet-zavod» təhsil-təcrübə əlaqələri sisteminin, belə bir qarşılıqlı faydalı əməkdaşlığın hər iki tərəf üçün uğurlu olacağı məmnunluqla qeyd edilib.
Tədbirdə gələcək kimyaçıların iki həftə ərzində “Azərikimya”nın müəssisələrində keçdikləri istehsalat təcrübəsinin onların yaddaşında uzun müddət qalacağı və gələcək müstəqil fəaliyyətləri dövründə - mütərəqqi texnologiyalar əsasında yaxın illərdə Sumqayıtda inşa olunacaq yeni müəssisə və istehsalat sahələrində çalışacaqları zaman xüsusilə faydalı olacağı diqqətə çatdırılıb.
M.Lomonosov adına Moskva Dövlət Universitetinin bugünlər xüsusi olaraq Bakıya gəlmiş müəllimi, «Kimya texnologiyaları və yeni kimyəvi materiallar» kafedrasının dosenti, kimya elmləri doktoru Natalya Sorokina və Universitetin Bakı filialının kimya fakültəsinin dekan müavini, tələbələrin praktika rəhbəri, texnika elmləri namizədi İqrar Nəzərov ilk gündən etibarən tələbələrin səimimi qəbuluna, Birlik rəhbərliyi və mütəxəssisləri tərəfindən onlara göstərilən diqqətə, istehsalat sahələrində praktika zamanı yaradılmış əlverişli şəraitə və qayğıya görə təmsil etdikləri Universitet kollektivi adından “Azərikimya” İB-nin rəhbərliyinə minnətdarlıqlarını bildiriblər.