Sosial

Ana səhifə

Sosial

Bakıda “Həmkarlar ittifaqları sağlam və təhlükəsiz əmək uğrunda” mövzusunda təlim-seminar keçirilib

01 dekabr 2011 10:54 (UTC +04:00)

Bakı. Şəhriyar Əlizadə - APA. Bu gün Bakıda “Həmkarlar ittifaqları sağlam və təhlükəsiz əmək uğrunda” mövzusunda təlim-seminar keçirilib.

APA-nın xəbərinə görə, tədbirdə çıxış edən Azərbaycan Həmkarlar İttifaqları Konfederasiyasının sədri Səttar Mehbalıyev həmkarlar ittifaqlarında işləyənlərin maraqlarının mühafizəsi üzrə geniş hüquq və səlahiyyətləri həyata keçirən kadrlar şəbəkəsinin yaradıldığını deyib: “Həmkarlar ittifaqlarının fəal iştirakı nəticəsində Milli Məclis əməyin mühafizəsi üzrə qanunda, Əmək Məcəlləsində, Vergi Məcəlləsində əlavə və dəyişikliklər edib. Həmkarlar ittifaqlarının təkliflərinə əsasən, əlavə məzuniyyətlərin, qısaldılmış iş vaxtının və ya zərərli əmək şəraitində işlərə görə kompensasiyaların, bir sıra qaydaların siyahıları Nazirlər Kabineti tərəfindən təsdiq olunub”.

S.Mehbalıyev qadınların işə götürülməsi ilə bağlı bəzi problemlərin olduğunu deyib: “Bəzən hamilə qadınları, azyaşlı uşağı olanları işə götürmürlər. Qanunda nəzərdə tutulub ki, azyaşlı uşağı olan qadın hər iki saatdan bir uşağına yemək verməlidir. Lakin şəhərin bir başından o biri başına hər iki saatdan bir gedib uşağa yemək vermək alınmır. Buna görə də qanunvericilikdə bu məsələlərlə bağlı müəyyən dəyişiklik edilməlidir”.

Tədbirdə çıxış edən Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin rəis müavini Rauf Tağıyev isə işçilərin hüquqlarının müdafiəsi üçün bir çox tədbirlərin görüldüyün deyib: “Biz çalışırıq ki, işçilərin hüquqları pozulmasın. Onların hüquqları hərtərəfli şəkildə qorunsun”.