Sosial

Ana səhifə

Sosial

Penitensiar Xidmətdə Türkmənistan nümayəndə heyəti ilə görüş keçirilib

03 mart 2012 14:05 (UTC +04:00)

Bakı. Şəhriyar Əlizadə - APA. Azadlıqdan məhrumetmə yerlərindəki mövcud vəziyyətin təkmilləşdirilməsi və cəza-icra siyasəti sahəsində əldə edilmiş təcrübənin mübadiləsi məqsədilə Türkmənistan Respublikasının nümayəndə heyəti Azərbaycanda işgüzar səfərdə olub.

Penitensiar Xidmətin ictimaiyyətlə əlaqələr şöbəsindən APA-ya verilən xəbərə görə, Azərbaycan hökuməti ilə Beynəlxalq Qırmızı Xaç Komitəsinin birgə keçirdiyi təcrübə mübadiləsi üzrə görüşlərdə iştirak edən nümayəndə heyəti Türkmənistan xarici işlər nazirinin müavini Vepa Hacıyev, daxili işlər nazirinin müavini Allamırat Hacıyev, DİN-in Cəzaların İcrası Departamentinin rəisi Çarı Gəldiyev və digər məsul şəxslərdən ibarət olub.

Ədliyyə Nazirliyinin Penitensiar Xidməti və Tibb Baş İdarəsi rəhbərliklərinin iştirakı ilə Penitensiar Xidmətin Baş idarəsində nümayəndə heyəti ilə görüş keçirilib.

Ədliyyə Nazirinin müavini, Penitensiar xidmətin rəisi Mədət Quliyev görüşdə çıxış edərək, son illərdə penitensiar sistemdə görülmüş işlər, habelə cəzaların icrasının təşkili ilə bağlı həyata keçirilmiş tədbirlər, əldə olunmuş müsbət nəticələr və həllini gözləyən problemlər, barədə ətraflı məlumat verib. M.Quliyev xüsusilə vurğulayıb ki, Penitensiar Xidmətin həyata keçirdiyi beynəlxalq əməkdaşlıq sahəsində də nəzərə çarpacaq müsbət dəyişikliklər əldə olunub. Qeyd olunub ki, Avropa Şurası, ATƏT, Beynəlxalq Qırmızı Xaç Komitəsi və digər mötəbər beynəlxalq qurumların nümayəndələri mütəmadi olaraq penitensiar müəssisələrdə və istintaq təcridxanalarında monitorinqlər keçirir, cəza çəkənlərin saxlanma şəraiti ilə yaxından tanış olur, fəaliyyətin daha da təkmilləşdirilməsi üçün müvafiq tövsiyələr təqdim edirlər.

M.Quliyev bu baxımdan BQXK ilə Penitensiar Xidmət arasındakı əməkdaşlığı xüsusilə yüksək qiymətləndirərək, son illər ərzində məhz BQXK ilə əməkdaşlığın daha da genişlənməsi nəticəsində məhkumlara və təqsirləndirilən şəxslərə, xüsusilə də ağciyər vərəminə düçar olmuşlara göstərilən səhiyyə xidmətinin səviyyəsinin xeyli artdığını, bunun da nəticəsində həmin xəstəlikdən vəfat edən şəxslərin sayının nəzərə çarpacaq dərəcədə azaldığını bildirib.

Görüşdə iştirak edən Ədliyyə Nazirliyinin Tibb Baş İdarəsinin rəisi Rafael Mehdiyev məhkumlara və təqsirləndirilən şəxslərə göstərilən tibbi xidmətin vəziyyətini şərh edərkən son dövrlərdə bu sahədə nəzərəçarpacaq nailiyyətlər əldə olunduğunu qeyd edib. Xüsusilə vurğulanıb ki, penitensiar müəssisələrdə və istintaq təcridxanalarında müasir tibbi avadanlığın quraşdırılması, dərman preparatları ilə təchizatın yaxşılaşdırılması və cəza çəkənlərə tibbi xidmətin keyfiyyətinin artırılması nəticəsində məhkumlar arasında ölüm halları xeyli azalıb, bir sıra ölkələrin nümayəndələri Azərbaycanın müsbət təcrübəsinin öyrənilməsi üçün ölkəmizə dəfələrlə səfərlər ediblər. BQXK-nın Azərbaycandakı nümayəndəliyinin rəhbəri xanım Şerin Pollini Penitensiar Xidmətlə əməkdaşlığın səmərəli olduğunu qeyd edib və son vaxtlar BQXK-nın tövsiyələrinə penitensiar müəssisələr tərəfindən daha fəal reaksiya verildiyini, bu tövsiyələrə əməl olunduğunu və əməkdaşlığın yüksək nəticələr verdiyini xüsusilə vurğulayıb.