Sosial

Ana səhifə

Sosial

Gənclər və İdman Nazirliyi BMT ilə birgə layihə həyata keçirəcək - FOTOSESSİYA

Gənclər və İdman Nazirliyi BMT ilə birgə layihə həyata keçirəcək - <font color=red>FOTOSESSİYA</font>

12 mart 2012 11:28 (UTC +04:00)

Bakı. Kəmalə Quliyeva – APA. Gənclər və İdman Nazirliyi və BMT-nin İnkişaf Proqramı (BMTİP) arasında “Qərarların qəbulu və dövlət siyasətinin icrasında gənclərin iştirakı” layihəsinin həyata keçirilməsi üçün birgə sənəd imzalanıb. APA-nın məlumatına görə, sənədə Azərbaycan hökuməti adından gənclər və idman naziri Azad Rəhimov, BMTİP adından isə BMT-nin Azərbaycandakı rezident-əlaqələndiricisi Fikrət Akçura imza atıb.
A. Rəhimov bildirib ki, layihə Azərbaycan üçün xüsusi önəm daşıyır: “Layihənin əsas məqsədi dövlət siyasətinin planlaşdırılması və nəticələrin əldə olunmasına gənclərin öz töhfəsini verməklə yanaşı, eyni zamanda qərarların qəbulu prosesində onların daha fəal iştirakını təmin etmək, gələcək liderlər və dövlət qulluqçuları kimi bacarıqlarını artırmaqdır. Layihə “Azərbaycan gəncliyi 2011-2015-ci illərdə Dövlət Proqramı”nın irəli sürdüyü prioritetləri dəstəkləməklə gənclərin idarəetmədə və vətəndaş cəmiyyətinin inkişafında iştirakının artırılması məqsədinə xidmət edir. Layihə dövlət proqramları və strategiyalarında gənclərə yönələn nəticələrin yerinə yetirilməsi üçün lazımi bilik və bacarıqları gənclərə çatdıracaq, dövlət qulluğuna daha çox gənci cəlb edəcək və beynəlxalq forumlarda iştirak üçün gənclərin bacarıqlarını inkişaf etdirəcək”.
F. Akçura isə qeyd edib ki, BMT Azərbaycanda gənclərlə bağlı həyata keçirilən dövlət proqramına öz dəstəyini verməyə hazırdır: “Azərbaycanda 29 yaşa qədər olan insanlar əhalinin böyük bir qismini təşkil edir. Buna görə də onlara yönəlik xüsusi proqramlar həyata keçirmək lazımdır”.
Qeyd edək ki, dəyəri 210 min ABŞ dolları həcmində olan layihə 2 il ərzində həyata keçiriləcək.