Sosial

Ana səhifə

Sosial

Bakıda insan alveri cinayətlərinin istintaqı mövzusunda seminar keçirilib

12 mart 2012 16:59 (UTC +04:00)

Bakı - APA. DİN-in İnsan Alverinə Qarşı Mübarizə İdarəsində (İAQMİ) polis zabitləri üçün insan alveri cinayətlərinin istintaqı mövzusunda seminar keçirilib.

DİN-in mətbuat xidmətindən APA-ya verilən məlumata görə, seminarda ekspert qismində ABŞ-ın Ədliyyə Departamentinin, bu ölkənin Azərbaycandakı səfirliyinin və Amerika Hüquqşünaslar Assosiasiyasının əməkdaşları iştirak ediblər.

Tədbiri giriş sözü ilə açan Respublika Hüquqşünaslar Konfederasiyasının sədri, Milli Məclisin Hüquq siyasəti və dövlət quruculuğu komitəsinin sədri, millət vəkili Əli Hüseynli bildirib ki, müstəqillik əldə etdikdən sonra Azərbaycanda bir çox hüquqi islahatlar keçirilib, beynəlxalq təşkilatlar qarşısında mühüm öhdəliklər götürülüb. 2000-ci ildə ölkəmizin Avropa Şurasının İnsan alverinə qarşı Konvensiyasına qoşulduğunu vurğulayan millət vəkili həyata keçirilən tədbirlərin, mütərəqqi hüquqi təcrübədən yararlanmanın insan hüquqlarının müdafiəsində və qorunmasında dönüş yaradacağını deyib, qarşıya çıxan problemlərin həllində vətəndaş cəmiyyətinin rolunu yüksək qiymətləndirib.

İnsan Alverinə Qarşı Mübarizə İdarəsinin rəisi, polis polkovniki Cavad Şıxəliyev insan alveri cinayətinin bu gün dünyada narkotiklə mübarizə, silah qaçaqmalçılığı, insan orqan və toxumalarının transplantasiyasından daha təhlükəli olduğunu, prezident İlham Əliyevin sərəncamı ilə 2006-cı ildə İAQMİ-nin yaranmasından sonra cinayətkarlığın bu növü ilə mübarizənin gücləndiyini, hətta region ölkələrində rast gəlinməyən bir çox tədbirlərin həyata keçirildiyini, buna misal olaraq insan alveri qurbanlarına sığınacaqların yaradıldığını, onlara birdəfəlik pul müavinətlərinin ayrıldığını nəzərə çatdırıb.

Ekspert Robert Stir dünyada insan alverinin hər il təxminən 9 milyard dollar gəlir gətirdiyini və qurbanlar sırasında iqtisadi baxımdan zəif inkişaf etmiş ölkələrin vətəndaşlarının çoxluq təşkil etdiyini, Vətəndaşların Əmək Hüquqlarının Müdafiəsi Liqasının sədri Sahib Məmmədov isə hazırda dünyada 12,3 milyon şəxsin məcburi əməyin qurbanı olduğunu, 270 milyon uşağın məcburi əməkdən əziyyət çəkdiyini diqqətə çatdırıb.

Ekspertlər tərəfindən tərtib olunmuş və insan alveri cinayətinin müxtəlif formalarını özündə əks etdirən testlərin, məntiqi sualların qarşılıqlı şəkildə cavablandırılmasının nəticələrini müsbət qiymətləndirən ekspert Erik Peterson bildirib ki, bu istiqamətdə Azərbaycanın hüququ-mühafizə orqanlarının təcrübəsi örnək sayıla bilər.

Seminarın sonunda iştirakçılara sertifikatlar verilib.