Sosial

Ana səhifə

Sosial

“20 Yanvar” Cəmiyyətinin sədri Sultan Əzimzadə Cəmiyyətin keçmiş sədri, hazırda İsveçdə yaşayan Rüstəm Rüstəmovun iddialarına cavab verib

17 mart 2012 09:04 (UTC +04:00)

S. Əzimzadənin APA-ya təqdim etdiyi cavab məktubunda bildirilir, hər il qanlı 20 yanvar ərəfəsində baş verən faciəvi hadisələrə müxtəlif prizmalardan yanaşılır və xalqımızın başına gətirilən soyqırım hadisəsinə rəylər verilir: “Bu il fevral ayının 6-da özünü “20 Yanvar” cəmiyyətinin təsisçisi və keçmiş sədri kimi özünü təqdim edən Rüstəmov Rüstəm Mahmud oğlu APA-ya müsahibə verib. O, 20 Yanvar hadisəsi barədə dolaşıq, həqiqətə uyğun olmayan, məntiqsiz, şəhidlər və yaralılar haqqında mənasız sözlər deyib. Rüstəm Rüstəmov 20 Yanvar hadisələrinə qədər AXC-nin fəal üzvü olduğunu israr edib. Əslində isə Rüstəm Rüstəmov AXC sıralarından bədnam şəkildə qovulan bir şəxsdir. R. Rüstəmov iddia edir ki, yanvarın 19-dan 20-nə keçən gecə AXC qərargahında olub və oradaca rus qoşunlarının açdığı atəş nəticəsində guya ağır güllə yarası alıb.

Müsahibəsinin digər hissəsində isə bildirir ki, 1990-cı il yanvar ayının 22-də şəhidlərin dəfn mərasimində iştirak edib. Bu iki bir-birini təkzib edən ifadələrdən görünür ki, onun söylədikləri fikirlərdən biri yanlışdır. Bu gün fəaliyyət göstərən “20 Yanvar” cəmiyyətində şəhidlərin və yaralıların dəqiq siyahısı var. Rüstəm Mahmud oğlu Rüstəmov adlı şəxsin 20 Yanvar hadisələri zamanı yaralanması və yaxud hər hansı bir xəsarət alması barədə heç bir sənəd mövcud deyil”.

Məktubda qeyd olunub ki, R. Rüstəmov atasının vəfatı ilə bağlı da həqiqətə uyğun olmayan fikirlər söyləyib: “Rüstəm Rüstəmov atası Mahmud Rüstəmovun 1992-ci ildə Qarabağda döyüş əməliyyatlarının birində şəhid olduğunu bildirib. Əslində isə Mahmud Rüstəmov 1992-ci ildə Bakı-Gəncə yolunun Yevlax rayonu ərazisində yolu keçərkən avtomobil qəzasına düşüb. Baş vermiş yol qəzası barədə o vaxt cinayət işi qaldırılıb. Mahmud Rüstəmov doğrudan da Şəhidlər xiyabanında dəfn olunub. Lakin mərhumun Şəhidlər xiyabanında dəfn olunması ona şəhid statusu verilməsinə imkan vermir. Rüstəm Rüstəmov mərhum atasının Şəhidlər xiyabanında dəfn olunmasından özünün siyasi maraqları naminə istifadə edir. Belə bir əməl 20 Yanvar və Qarabağ şəhidlərinə, Qarabağ müharibəsi və 20 Yanvar əlillərinə təhqirdir. Xalqın faciəsindən öz çirkin məqsədləri üçün istifadə etmək yaramazlıqdır”.

Məktubda R. Rüstəmovun “20 Yanvar” qəzetinin baş redaktoru Səlim Həqqini 1992-ci ildə hakimiyyətdə olanların qətlə yetirməsi barədə iddiasına da münasibət açıqlanır: “Bildiririk ki, Rüstəm və Ələsgər Rüstəmov qardaşları Səlim Həqqinin və həyat yoldaşının qətlə yetirilməsində təqsirli bilinərək həbs olunublar. Hadisə baş verən vaxt Ələsgər Rüstəmov (Rüstəm Rüstəmovun doğma qardaşı) Səlim Həqqinin mənzilində olub. Bu barədə olan faktların araşdırılması “20 Yanvar” cəmiyyətinin deyil, istintaq orqanının işidir”.

Cəmiyyət qurumun R. Rüstəmov tərəfindən təsis olunması ilə bağlı da məsələyə aydınlıq gətirib: ““20 Yanvar” cəmiyyətinin təsis olunması və Ədliyyə Nazirliyində qeydiyyatdan keçirilmə prosesini doğrudan da Rüstəm Rüstəmov yerinə yetirib. Cəmiyyətin təsis olunması, təsis yığıncağının keçirilməsi yalnız kağız üzərində aparılıb. Rüstəm Rüstəmov tərəfindən “təsis” olunan “20 Yanvar” Cəmiyyəti o zamanlar hakimiyyət dairələrinin himayə etdiyi və Ağa Axundov adlı şəxsin rəhbərlik etdiyi silahlı qruplaşma kimi tanınan “Qardaşlıq” Cəmiyyətinin nəzdində fəaliyyət göstərdiyi bəlli olandan sonra şəhid ailələri və yaralılar buna qəti etiraz ediblər. Nəticə olaraq şəhid ailələri və yaralılar toplanaraq “20 Yanvar” cəmiyyətini yenidən təsis edib, şəhid atası və 2-ci qrup 20 Yanvar əlili Fərman Məmmədov açıq səsvermə yolu ilə sədr seçilib. Beləliklə, dələduzluqla məşğul olan və “20 Yanvar” cəmiyyətinin adından özünün çirkin məqsədləri üçün istifadə edən Rüstəm Rüstəmov cəmiyyətin sədrliyindən uzaqlaşdırılıb. “20 Yanvar” cəmiyyəti hesab edir ki, Rüstəm Rüstəmovun özündən qəhrəman obrazı düzəltmək naminə yalanlar uydurmaq və cəmiyyətə sırımaq cəhdi 1992-ci ildə qalıb. Rüstəm Rüstəmovun nəzərinə çatdırırıq ki, 1990-cı il 20 Yanvar faciəsi ilə bağlı Ali Sovetin yaratdığı komissiyada Sabit Bağırov adlı şəxs olmayıb. Eləcə də 1990-cı ildən bəri nə 20 Yanvar cəmiyyətini rəhbərliyində, nə də Azərbaycanın ali qurumlarında Niyazi Mehdi adlı şəxs çalışıb. Görünür, Rüstəm elə anlayır ki, artıq onun bəd əməllərindən xəbəri olan şahidlər yoxdur, ona görə də ağzına gələn hədyanları danışır. Hadisələrdən 22 il keçəndən sonra baş verənlərə özünəməxsus şəkildə özünün əyri prizmasından baxır. Rüstəm Rüstəmovun 20 Yanvar hadisələrinin “səbəbkarlarını” öz içimizdə axtarması düşmən dəyirmanına su tökməkdən başqa bir şey deyil. 20 yanvar hadisələri zamani şəhid olmuş Azərbaycan vətəndaşlarının say məsələsində də Rüstəmov ciddi yanlışlığa yol verir. Hadisələr zamanı şəhid olanların milli tərkibi belədir: 117 nəfər milliyyətcə azərbaycanlı, 6 nəfər rus, 3 nəfər yəhudi və 3 nəfər tatar. 2 nəfərin şəxsiyyətini müəyyən etmək mümkün olmayıb, 4 nəfər isə itkin sayılır. Azərbaycan cəmiyyətinin, eləcə də 20 Yanvar faciəsini yaşamış şəhid ailələri və yaralıların Rüstəm Rüstəmov kimi saxta 20 Yanvar yaralısına ehtiyacı yoxdur. O, elə İsveçdə yaşamağa məhkumdur. Azərbaycan xalqının cəmiyyətin radioaktiv tullantılarına ehtiyacı yoxdur”.