Sosial

Ana səhifə

Sosial

Kəmaləddin Heydərov: “Bu gün Ağsu aşırımının minik avtomobillərinin hərəkəti üçün açılması gözlənilir”

29 mart 2012 12:28 (UTC +04:00)

Şamaxı. Elvin Yaqubov - APA. “Təbii fəlakətlə əlaqədar sakinlərin köçürülməsi və onların yeni mənzillərlə təmin olunması üçün bütün lazımı işlər görüləcək”. APA-nın yerli müxbirinin məlumatına görə, bunu Şamaxı rayonunun Muğanlı kəndində torpaq sürüşməsi nəticəsində evləri qəzalı vəziyyətə düşən sakinlərlə görüş keçirən fövqəladə hallar naziri Kəmaləddin Heydərov jurnalistlərə açıqlamasında deyib.

Nazir bildirib ki, sürüşmə zonasına, eləcə də yaşayış üçün yararsız vəziyyətə düşən fərdi yaşayış evlərinə baxış keçirilib: “Bura çox təhlükəlidir. Hər an xoşagəlməz hadisə baş verə bilər. Kənddə qəzalı vəziyyətdə olan 46 ev çox təhlükəli ərazidə yerləşir və onların bir neçəsi artıq dağılıb. Təcili köçürülmə işləri aparılacaq. Rayonun Meysəri kəndinə yaxın ərazidə yerləşən Muğanlı bələdiyyəsinə məxsus 55 hektar pay və bələdiyyə torpağında yeni evlərin tikilməsi mümkündür. Həmin əraziyə mütəxəssislərlə birgə baxış keçirdik. Əhalinin istəyi də nəzərə alınacaq. Geoloji-mühəndis işləri aparılacaq, ərazinin təhlükəsiz olub-olmaması müəyyən edildikdən sonra evlərin tikintisi üçün layihələndirmə işləri görüləcək. Ölkə başçısının tapşırığına əsasən, qısa müddətdə sakinlər yeni evlər, məktəb, tibb məntəqəsi və digər sosial obyektlərlə təmin olunacaqlar”.

K. Heydərovun sözlərinə görə, Fövqəladə Hallar, Ekologiya və Təbii Sərvətlər və Nəqliyyat nazirliklərinin, Baş Dövlət Yol Polisi İdarəsinin nümayəndələri Ağsu aşırımına baxış keçirirlər və bu gün Ağsu aşırımının yalnız minik avtomobillərinin hərəkəti üçün açılmasına icazə verilməsi gözlənilir.

sürüşmə