Sosial

Ana səhifə

Sosial

Apreldə Azərbaycanda havanın orta aylıq temperaturunun iqlim normasına yaxın və bir qədər yüksək olacağı proqnozlaşdırılır

30 mart 2012 11:04 (UTC +04:00)

Ekologiya və Təbii Sərvətlər Nazirliyinin Milli Hidrometeorologiya Departamentinin Hidrometeoroloji Proqnozlar Bürosundan APA-ya verilən məlumata görə, aylıq yağıntının miqdarının iqlim normasına yaxın, bəzi şimal və şərq rayonlarında isə normadan bir qədər çox olacağı ehtimal olunur.

Bakı və Abşeron yarımadasında orta aylıq temperatur 11-13 dərəcə isti olacaq ki, bu da iqlim normasına yaxın və 1 dərəcə yüksəkdir. Gecələr 5-10 dərəcə isti, ayın ikinci yarısının bəzi günlərində 12-15 dərəcə isti olacaq. Gündüzlər temperatur 13-18 dərəcə isti olacaq, ayın ikinci yarısında 22-27 dərəcəyədək yüksələcək.

Naxçıvan MR-da orta aylıq temperaturun 11-15 dərəcə isti olacağı gözlənilir ki, bu da iqlim normasına yaxın və 1 dərəcə yüksəkdir. Gecələr 3-8 dərəcə isti, birinci ongünlüyün bəzi günlərində 0 dərəcəyə yaxın, ayın ikinci yarısının bəzi günlərində 9-13 dərəcə isti olacaq. Gündüzlər 14-19 dərəcə isti olacaq, ayın ikinci yarısının bəzi günlərində temperatur 25-29 dərəcəyədək yüksələcək.

Yuxarı Qarabağ: Xankəndi, Şuşa, Xocalı, Xocavənd; Qubadlı, Zəngilan, Laçın, Kəlbəcər və Daşkəsən, Gədəbəy rayonlarında orta aylıq temperatur 6-10 dərəcə isti iqlim normasına yaxın olacaq. Gecələr 2-7 dərəcə isti, birinci ongünlüyün bəzi günlərində 0-4 dərəcə şaxta olacaq. Gündüzlər temperatur 9-14 dərəcə isti olacaq, ayın ikinci yarısında 18-23 dərəcəyədək yüksələcək.

Qazax-Gəncə, Goranboy, Tərtər-Ağdam-Ağcabədi-Füzuli-Cəbrayıl rayonlarında orta aylıq temperatur 12-14 dərəcə isti olacaq, bu da iqlim normasına yaxın və 1 dərəcə yüksəkdir. Gecələr 5-9, birinci ongünlüyün bəzi günlərində 0-4 dərəcə isti təşkil edəcək. Gündüzlər 12-17 dərəcə isti olacaq, ayın ikinci yarısının bəzi günlərində 22-27 dərəcəyədək yüksələcək.

Balakən, Zaqatala, Qax, Şəki, Oğuz, Qəbələ, İsmayıllı, Ağsu, Şamaxı, Siyəzən, Şabran, Xızı, Quba, Xaçmaz, Qusar rayonlarında orta aylıq temperatur 8-13 dərəcə isti olacağı gözlənilir ki, bu da iqlim normasına yaxın və 1 dərəcə yüksəkdir. Gecələr 4-9 dərəcə isti, birinci ongünlüyün bəzi günlərində 0-3 dərəcə şaxta təşkil edəcək. Gündüzlər temperatur 11-16, birinci ongünlüyün bəzi günlərində 3-8 dərəcə isti olacaq, ayın ikinci yarısında isə 22-27 dərəcəyədək yüksələcək. Aylıq yağıntının miqdarının iqlim normasına yaxın, bəzi yerlərdə isə bir qədər çox olacağı gözlənilir.

Mərkəzi-Aran: Ağdaş, Mingəçevir, Yevlax, Kürdəmir, İmişli, Beyləqan, Sabirabad, Biləsuvar, Saatlı, Şirvan, Hacıqabul, Salyan, Neftçala rayonlarında orta aylıq temperatur 13-15 dərəcə isti gözlənilir ki, bu da iqlim normasına yaxın və 1 dərəcə yüksəkdir. Temperatur gecələr 7-12, birinci ongünlüyün bəzi günlərində 0-4 dərəcə isti təşkil edəcək. Gündüzlər temperatur 15-20 dərəcə isti olacaq, bəzi günlərdə 25-30 dərəcəyədək yüksələcək. Aylıq yağıntının miqdarı iqlim normasına yaxın olacaq.

Masallı-Lənkəran-Astara-Lerik, Yardımlı rayonlarında orta aylıq temperatur 10-15 dərəcə isti olacaq ki, bu da iqlim normasına yaxın və 2 dərəcə yüksəkdir. Gecələr 6-11, bəzi günlərdə 1-3 dərəcə isti, dağlarda 0-5 dərəcə şaxta olacaq. Gündüzlər 14-19 dərəcə isti olacaq, bəzi günlərdə 23-27 dərəcəyədək yüksələcək. Aylıq yağıntının miqdarının iqlim normasına yaxın, bəzi yerlərdə isə bir qədər çox olacağı gözlənilir.