Sosial

Ana səhifə

Sosial

“Samur-Yalama Milli Parkı”nın, Qızılağac Dənizkənarı Milli Parkının və “Zaqatala-Balakən Biosfer Rezervatının” formalaşdırılması prosesi həyata keçirilir

21 may 2012 10:22 (UTC +04:00)

Bakı. Sevil Zeynalqızı - APA. Azərbaycanda “Samur-Yalama Milli Parkı”nın, Qızılağac Dənizkənarı Milli Parkının və “Zaqatala-Balakən Biosfer Rezervatının” formalaşdırılması prosesi həyata keçirilir. APA-nın məlumatına görə, bunu ekologiya və təbii sərvətlər naziri Hüseyn Bağırov YAP-ın saytına müsahibəsində bildirib. Nazir deyib ki, bioloji müxtəlifliyin qorunub saxlanılması məqsədilə həyata keçirilmiş tədbirlər nəticəsində xüsusi mühafizə olunan təbiət ərazilərinin ümumi sahəsi 2003-cü ildən etibarən 478 min hektardan 1 132,5 min hektaradək artırılır. Nəticədə 10 milli park, 1 biosfer rezervat, 11 qoruq və 24 yasaqlıqdan ibarət şəbəkə ölkə ərazisinin 13,1 faizini təşkil edəcək ki, bu da dünyada qəbul olunmuş orta səviyyədən (11-12 faiz) artıqdır.

Vəhşi təbiətin mühafizəsi istiqamətində aparılan işlərdən danışan nazir qeyd edib ki, 2010-cu ildən etibarən ceyranların tarixi ərazilərinə reintroduksiyası layihəsinə başlanıb, bu günədək 100 başadək ceyran öz tarixi areallarına buraxılıb.

H. Bağırovun sözlərinə görə, son dövrlərdə iqlim dəyişmələrinin təsirindən yaranan təhlükəli hidrometeoroloji hadisələrə nəzarətin gücləndirilməsi, proqnoz və erkən xəbərdarlıq sisteminin təkmilləşdirilməsi üçün hidrometeorologiya sahəsində yeni texnologiyaların tətbiqi və modernləşdirmə işləri aparılır: “Bu məqsədlə ölkədə çətin keçilən ərazilərdə hidrometeoroloji şəraiti daha dəqiq və fasiləsiz izləməyə imkan verən 18 Avtomat Meteoroloji Stansiya, 8 avtomat yağıntıölçən, 5 avtomat su səviyyəsi ölçən və 2 ultrasəs su sərfi ölçən cihazlar qurulub. Eyni zamanda, Kür çayının mənsəbində səviyyə tərəddüdünü və Bazardüzü-Şahdağ-Tufandağ ekosisteminin 3700 metr yüksəkliyədək ərazilərində meteoroloji şəraiti real vaxt rejimində izləməyə imkan verən videogörüntülərin alınması üçün avadanlıqlar quraşdırılıb və hazırda Kiş çayında sel axınlarını və Ləzədə meteoroloji şəraiti fasiləsiz izləməyə imkan verən avadanlıq qurulur”.