Azərbaycanın strateji valyuta ehtiyatları 85,8 milyard dollara çatıb və bu göstərici xarici şoklara qarşı etibarlı maliyyə buferi rolunu oynayır.
“APA-Economics” xəbər verir ki, bunu Azərbaycan Mərkəzi Bankı sədrinin birinci müavini Əliyar Məmmədyarov Dünya Bankının "Azərbaycan üzrə Ölkə İqtisadi İcmalı – Yaz 2026" hesabatının təqdimatında deyib.
Onun sözlərinə görə, qlobal iqtisadiyyat geosiyasi gərginlik, təchizat zəncirlərində pozuntular və iqlim riskləri ilə üzləşsə də, Azərbaycanın xarici mövqeyi əlverişli olaraq qalır.
O qeyd edib ki, maliyyə sektoru dayanıqlığını qoruyur. Kapital adekvatlığı əmsalı 17%, likvidliyin örtülməsi əmsalı 155%, problemli kreditlərin xüsusi çəkisi 2,9% təşkil edir. Kreditlər üzrə dollarlaşma 13,7%-ə, rezident depozitləri üzrə isə 27%-ə qədər azalıb.
AMB sədrinin birinci müavini bildirib ki, hazırda Azərbaycan iqtisadiyyatında üç əsas struktur dəyişiklik müşahidə olunur. Qeyri-neft sektoru iqtisadi artımda getdikcə daha böyük rol oynayır, artımın mənbələri tikinti kimi qeyri-ticarət sahələrindən nəqliyyat-logistika, informasiya texnologiyaları və qeyri-neft sənayesi kimi ixracyönümlü sahələrə keçir, iqtisadi artım isə dövlət xərclərindən daha az, özəl sektorun fəaliyyəti hesabına formalaşır.
Əliyar Məmmədyarovun sözlərinə görə, AMB-nin may proqnozuna əsasən, bu il Azərbaycanda ÜDM-in 1,1%, 2027-ci ildə isə 3,2% artacağı gözlənilir. Qeyri-neft sektorunda artımın isə müvafiq olaraq 3,2% və 4,7% olacağı proqnozlaşdırılır.
O vurğulayıb ki, iqtisadiyyatın növbəti inkişaf mərhələsində şaxələndirmə həlledici rol oynayacaq və bu baxımdan turizm sektoru böyük istifadə olunmamış potensiala malikdir. Onun sözlərinə görə, hava əlaqələrinin genişlənməsi, viza rejiminin sadələşdirilməsi və turizm istiqamətlərinin təşviqi nəticəsində son üç ildə turizm gəlirləri orta hesabla hər il 38% artıb. 2026-cı ilin birinci rübündə isə turizm xidmətlərinin ixracı qeyri-neft xidmət ixracının 21%-ni təşkil edib.
Əliyar Məmmədyarov əlavə edib ki, Dünya Bankının hesabatında nəqliyyat və informasiya əlaqələrinin gücləndirilməsi, regional turizm istiqamətlərinin inkişafı, özəl sektorun iştirakının artırılması və insan kapitalına investisiyaların genişləndirilməsi ilə bağlı tövsiyələr
Azərbaycanın uzunmüddətli inkişaf prioritetləri ilə üst-üstə düşür.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
