Sosial

Ana səhifə

Sosial

Türkiyənin əmək və sosial müdafiə naziri DSMF sədri ilə görüşüb - FOTOSESSİYA

Türkiyənin əmək və sosial müdafiə naziri DSMF sədri ilə görüşüb - <font color=red>FOTOSESSİYA</font>

12 iyul 2012 12:24 (UTC +04:00)

Bakı. Əli Əhmədov – APA-Economics. Hazırda Azərbaycanda qeydiyyatdan keçmiş əcnəbi işçilərin yarıdan çoxu Türkiyə vətəndaşlarıdır. «APA-Economics»in xəbərinə görə, bunu Dövlət Sosial Müdafiə Fondunun (DSMF) sədri Səlim Müslümov Bakıda səfərdə olan Türkiyənin əmək və sosial müdafiə naziri Faruk Çelikin başçılıq etdiyi nümayəndə heyəti ilə görüşdə bildirib. DSMF-nin fərdi hesablar sistemində 94 ölkədən 12 921 nəfər qeydiyyatdadır ki, bunun da 58,2%-i və ya 7 506 nəfəri Türkiyə vətəndaşlarıdır.

Qeyd edək ki, 1998-ci ildə imzalanmış «Azərbaycan Respublikası hökuməti ilə Türkiyə Respublikası hökuməti arasında sosial müdafiə sahəsində əməkdaşlıq haqqında» sazişə əsasən, Türkiyə və Azərbaycan vətəndaşlarının həmin ölkələrin ərazisində göstərdikləri əmək fəaliyyəti dövründə qazanmış olduqları əmək pensiyası hüquqları qarşılıqlı olaraq tanınır və pensiya təyinatında nəzərə alınır.

Bununla yanaşı S.Müslümov bildirib ki, ölkədə Türkiyədən olan və rəsmi qeydiyyata düşməyən insanlar da çalışır: «Bizim vəzifəmiz Dövlət Miqrasiya Xidməti ilə birlikdə Azərbaycanda əmək fəaliyyəti üçün lisenziya almış türk vətəndaşlarının hamısının çalışdıqları yer üzrə sosial sığortaya cəlb olunmasıdır».

Görüşdə müzakirə olunan əsas məsələlərdən biri qeydiyyatdan yayınan işçilərin aşkar edilərək qeydə alınması və onların əmək haqlarının sosial sığortaya cəlb olunması ilə bağlı təcrübələrə aid olub. Qeyd olunub ki, Türkiyədə həyata keçirilən proqram nəticəsində son 4 ildə qeydə alınan işçilərin sayı 14 milyondan 17,9 milyona çatıb.

Türkiyənin əmək və sosial müdafiə naziri F.Çelik bildirib ki, qeydiyyatın artmasının əsas səbəblərindən biri ölkədə məcburi tibbi sığortanın tətbiq edilməsi olub. Görüşdə qeyd edilib ki, oxşar təcrübənin Azərbaycanda da tətbiq edilməsi, yəni məcburi tibbi sığorta sisteminin işə düşməsi Azərbaycanda da işləyənlərin qeydiyyatına dəstək ola bilər.

Azərbaycanda əsas problemlərdən birinin işləyənlərin qeydiyyatdan yayınması və onların əmək haqlarının az göstərilməsi ilə bağlı olduğunu deyən S.Müslümov qarşıdakı aylarda bununla bağlı ciddi tədbirlərin görüləcəyini bildirib. Yeri gəlmişkən, onun sözlərinə görə, işçilərin maaşlarını azaldan və bu üsulla sosial sığorta ödəmələrindən yayınan şirkətlər arasında Azərbaycanda fəaliyyət göstərən türk şirkətləri də var: «Adamların sayını gizlədirlər, maaşları endirirlər və bu maaşların ümumi məbləğini azaldırlar ki, sosial sığorta haqlarını və gəlir vergisini ödəməsinlər».

Görüşdə müzakirə olunan digər məsələ Azərbaycanda çalışan Türkiyə vətəndaşlarının tibbi sığortaya cəlb edilməməsi problemi ilə bağlı olub. Belə ki, iki ölkə arasında imazalanmış müqaviləyə əsasən, digər ölkədə çalışan vətəndaşlar həmin ölkədə sosial sığortanın bütün növləri, o cümlədən tibbi sığorta ilə təmin olunmalıdır. Amma Azərbaycanda icbari tibbi sığorta tətbiq edilmədiyinə görə, burada çalışan türk vətəndaşları da bu sığorta növündən istifadə edə bilmir, baxmayaraq ki, Türkiyədə çalışan azərbaycanlılar bu xidmətdən yararlanır. Görüşdə Türkiyə tərəfinin qaldırdığı bu məsələ geniş müzakirə edilib. Türkiyəli nazir bu məsələnin Səhiyyə Nazirliyi ilə də müzakirə edəcəyini bildirib.