Sosial

Ana səhifə

Sosial

Elnur Aslanov: “Biz yeni çağırışlara yeni imkanlar vasitəsilə cavab verə biləcək kreativ nəsil formalaşdırmalıyıq”

25 iyul 2012 10:17 (UTC +04:00)

Bakı. Kəmalə Quliyeva-APA. Bakıda Gənc Alimlərin II Respublika İnnovativ İdeya Yarmarkası keçirilir. APA-nın məlumatına görə, Azərbaycan Respublikasının Prezidenti yanında Elmin İnkişafı Fondu və Gənclər və İdman Nazirliyinin dəstəyi ilə Azərbaycan Milli Elmlər Akademiyası, AMEA Gənclərin İntellektual İnkişaf Mərkəzi və Azərbaycan Gənc Alim, Aspirant və Magistrlər Cəmiyyəti tərəfindən keçirilən yarmarka “Azərbaycan gəncliyi 2011-2015-ci illərdə” Dövlət Proqramının müvafiq bəndinin icrası məqsədilə təşkil olunub.

Tədbirdə çıxış edən Elmin İnkişafı Fondunun icraçı direktoru Elçin Babayev bildirib ki, Azərbaycan dövləti gənclərin ölkənin gələcək inkişafında rol oynaya bilmələri üçün bütün lazımi tədbirləri həyata keçirir: “Azərbaycanda gənclər siyasətinin əsası ümummilli lider Heydər Əliyev tərəfindən qoyulub. Son illər ərzində ölkədə Elmin İnkişafı Fondunun, Gənclər Fondunun yaradılması, gənc alimlərin xaricdə təhsili ilə bağlı mühüm qərarlar qəbul edilib. Elmin İnkişafı Fondunun da əsas niyyətlərindən biri Azərbaycanda alınan elmi nəticələrin dünya miqyasına çıxarılmasıdır. Belə yarmarkalar bu işə böyük töhfələr verə bilər”.

Prezident Administrasiyasının siyasi təhlil və informasiya təminatı şöbəsinin müdiri Elnur Aslanov isə bildirib ki, gənclər Azərbaycanı gələcək inkişafa aparan əsas qüvvədir: “İstənilən iqtisadi, siyasi, sosial mədəni inkişaf elmdən qaynaqlanır. Bizim əsas məqsədimiz bu gün Azərbaycanda elmə yiyələnən iqtisadiyyatın, siyasətin qurulmasıdır: Bu gün həm yeni çağırışlar, həm yeni imkanlar var. Biz yeni çağırışlara yeni imkanlar vasitəsilə cavab verə biləcək kreativ nəsil formalaşdırmalıyıq.
İstənilən cəmiyyəti gələcəyə aparan onun elmi və intellektual potensiala malik gəncləridir. “Azərbaycan gəncliyi 2011-2015-ci illərdə” Dövlət Proqramında Azərbaycan gəncliyinin inkişafına, işsizlik probleminin həllinə, Azərbaycanda gənclərin innovativ təfəkkür tərzinin formalaşdırılmasına yönəlik addımlar nəzərdə tutulub”.
Yarmarka çərçivəsində Azərbaycan Respublikasının Prezidenti yanında Elmin İnkişafı Fondunun gənc alim və mütəxəssislərin 1-ci müsabiqəsi üzrə qalib olmuş qrant layihəsi üzrə “Yeni çağırışlar: müasir şəraitdə elmi innovativ tədqiqat işlərinin təcrübi və tətbiqi əsasları” adlı Gənc alimlərin elmi konfransının (25-27 iyul tarixlərində) və gənc alimlər arasında elmi-innovativ ideyalar müsabiqəsinin keçirilməsi nəzərdə tutulub. Konfrans və müsabiqədə gənc alim və tədqiqatçılar elmi məruzə və təqdimatlarla çıxış edəcəklər.

Tədqiqatçıların çıxışları AMEA-nın həqiqi və müxbir üzvlərindən ibarət münsiflər heyəti tərəfindən qiymətləndiriləcək. Elmi-innovativ ideyalar müsabiqəsində 1, 2 və 3-cü yerləri tutan gənc tədqiqatçılara qiymətli hədiyyələr təqdim olunacaq.