Sosial

Ana səhifə

Sosial

Azərbaycan prezidenti 85 nömrəli orta məktəbin yeni korpusunun açılış mərasimində iştirak edib - YENİLƏNİB

Azərbaycan prezidenti 85 nömrəli orta məktəbin yeni korpusunun açılış mərasimində iştirak edib - <font color=red>YENİLƏNİB</font>

02 avqust 2012 14:29 (UTC +04:00)

Bakı-APA. Bakının Suraxanı rayonunun Yeni Suraxanı qəsəbəsindəki R. Abdinov adına 85 nömrəli tam orta məktəbin yeni korpusunun açılış mərasimi olub. APA-nın məlumatına görə, Azərbaycan prezidenti İlham Əliyev açılış mərasimində iştirak edib. Bakının kənd və qəsəbələrinin sosial-iqtisadi inkişafının sürətləndirilməsi ilə bağlı həyata keçirilən tədbirlərin icrası ilə əlaqədar dövlətimizin başçısı paytaxtın Suraxanı rayonunda görülən işlərlə tanış olarkən Yeni Suraxanı qəsəbəsinin sakinləri 85 nömrəli orta məktəbin bir korpusunun tamamilə yararsız vəziyyətdə olduğunu bildirib və bu tədris ocağının yenidən qurulmasına kömək göstərilməsini xahiş ediblər. Prezident İlham Əliyev yeni korpusun inşa olunması ilə bağlı yerindəcə göstərişlər verib. 2011-ci ilin iyulunda dövlət başçısı məktəbin kollektivi ilə birlikdə yeni tədris korpusunun təməlqoyma mərasimində iştirak edib. Üç mərtəbədən, 27 otaqdan ibarət yeni korpusun tikintisi qısa vaxt ərzində müasir tələblər səviyyəsində başa çatdırılıb. Azərbaycan prezidenti İlham Əliyev yeni korpusun rəmzi açılışını bildirən lenti kəsib.
Bakı Şəhər İcra Hakimiyyətinin başçısı Hacıbala Abutalıbov görülən işlərlə bağlı Prezident İlham Əliyevə məlumat verib. İnşa olunan yeni korpusda 480 şagird təhsil alacaq. Üç korpusdan ibarət 85 nömrəli məktəbdə ümumilikdə 840 şagirdin təhsil aldığı bildirilib. Dövlət başçısı yeni korpusun foyesində Heydər Əliyev və prezident İlham Əliyevin təhsil sahəsində gördüyü işləri əks etdirən fotostendə baxıb. Burada şagirdlərin təhsil almaları üçün bütün şəraitin yaradıldığı vurğulanıb. Prezident İlham Əliyev ayrı-ayrı sinif otaqlarına və fənn kabinetlərinə baxıb, buradakı şəraitlə yaxından tanış olub.

Fizika, kimya və digər fənn kabinetlərinin, təcrübə laboratoriyalarının tədris üçün lazım olan ən müasir avadanlıqla təchiz olunduğu qeyd edilib. Məktəbin ərazisində yeni dərs ilinə qədər idman və akt zallarının, yeməkxananın inşa olunacağı da nəzərdə tutulur. Ərazidə açıq idman meydançasının salınacağı da vurğulanıb.

85 nömrəli məktəbin yeni korpusunda yaradılan şəraitlə tanışlıqdan sonra dövlətimizin başçısı müvafiq tapşırıqlarını verib.

Azərbaycan prezidenti İlham Əliyev Bakının Suraxanı rayonunun Yeni Suraxanı qəsəbəsindəki 85 nömrəli tam orta məktəbin yeni korpusunun açılış mərasimindən sonra Bülbülə qəsəbəsindəki 268 nömrəli körpələr evi-uşaq bağçasının əsaslı yenidənqurmadan sonrakı vəziyyəti ilə tanış olub. 2011-2013-cü illərdə Bakı şəhərinin və onun qəsəbələrinin sosial-iqtisadi inkişafına dair Dövlət Proqramında məktəblərin və uşaq bağçalarının əsaslı təmir və yenidən qurulması ilə bağlı nəzərdə tutulmuş tədbirlər planına uyğun olaraq Suraxanı rayonunun Bülbülə qəsəbəsindəki 268 nömrəli körpələr evi-uşaq bağçası da əsaslı şəkildə yenidən qurulub. Dövlət başçısına 268 nömrəli körpələr evi-uşaq bağçasında görülən işlərlə bağlı məlumat verilib.

Bağçanın binası 1989-cu ildə inşa olunub, Azərbaycan prezidentinin tapşırığı ilə 2012-ci ildə əsaslı şəkildə yenidən qurulub. Bağçada 240 nəfərdən ibarət 12 qrup fəaliyyət göstərir. Əsaslı təmir və yenidənqurma işlərindən sonra körpələr evi-uşaq bağçasında hər cür şərait yaradılıb. Uşaqların yataq otaqları, əyləncə yerləri, mətbəx və digər sahələr ən müasir standartlar səviyyəsində yenidən qurulub.

Körpələr evi-uşaq bağçası ilə yaxından tanış olan dövlətimizin başçısı müvafiq tapşırıqlarını verib.