Sosial

Ana səhifə

Sosial

Naxçıvanda 123 müəssisədə 282 hüquq pozuntusu aşkarlanıb

13 yanvar 2007 13:24 (UTC +04:00)

Naxçıvan Muxtar Respublikası (NMR) Əmək və Əhalinin Sosial Müdafiəsi Nazirliyinin nəzdindəki Dövlət Əmək Müfəttişliyinə əmək hüquqlarının pozulması ilə bağlı vətəndaşlardan 2006-cı ildə 47 ərizə daxil olub ki, bu da 2005-ci ildəkindən 51 ərizə azdır. Müfəttişlik tərəfindən aparılan araşdırmalar nəticəsində bu ərizələrin icrası 100% təmin edilib. Bu barədə APA-nın Naxçıvan bürosuna müfəttişliyin rəisi Azər Cəfərov məlumat verib.
A.Cəfərov bildirib ki, 2005-ci ildə daxil olan şikayət ərizələrinin əksəriyyəti vətəndaşların işə çıxdığı zaman onların işlədiyi müddət ərzində əvvəlki dövrlərdə əsas əmək məzuniyyətlərinin verilməməsi və bü məzuniyyətlərin pulla əvəzlənməsi ilə bağlı olub. Ötən il isə bu növ ərizələrin sayı cəmi 1 ədəd olub: “Ərizələrin azalmasının başlıca səbəbi müfəttişliyin əməkdaşları tərəfindən müəssisə və təşkilatlarda hüquqi, həmçinin də fiziki şəxslər arasında mütəmadi olaraq maarifləndirmə tədbirlərinin aparılmasıdır”.
Bundan başqa, ötən il NMR-nin idarəetmə orqanlarından, müəssisə və təşkilatlarından daxil olmuş 215 məktub da araşdırılaraq cavablandırılıb. Ötən müddət ərzində müəssisə və təşkilatlar tərəfindən vətəndaşlara vəsaitin vaxtında ödənilməməsi hallarına isə ümumiyyətlə rast gəlinməyib.
Qeyd edək ki, 2005-ci ildə müfəttişliyə daxil olan şikayət ərizələri əsasında vətəndaşlara 12 mln. 362 min 497 AZM ödənilib. Bunun 10 mln. 479 min 998 AZM-i əmək haqqı, 575 min manatı dəymiş zərərə görə ödənişlər, 1 mln. 307 min 499 AZM-i sosial müavinətlər təşkil edib. Ötən il isə müfəttişliyə belə şikayət ərizələri daxil olmadığından bu cür ödənişlər aparılmayıb. Həmçinin, 2006-cı ildə 22 halda yerli vergi orqanlarından daxil olmuş protokollar əsasında işəgötürənlərin inzibati məsuliyyətə cəlb olunması üçün qərar verilib. İnzibati Xətalar Məcəlləsinin müvafiq maddələrinə uyğun olaraq, həmin obyektlərə ümumilikdə 1980 AZN cərimə tətbiq edilib. Cərimənin 1273 AZN-i dövlət büdcəsinə ödənilib, 707 manatın ödənilməsi isə nəzarətdə saxlanılıb. Son iki ildə muxtar respublikada fəaliyyət göstərən sənaye müəssisələrində 5 bədbəxt hadisə baş verib ki, onlardan 4-ü 2005-ci ildə, 1-i isə 2006-cı ildə qeydə alınıb. Təhqiqat nəticəsində 2005-ci ildə baş verən bədbəxt hadisələr zamanı 3 müəssisə qismən təqsirkar bilinib. Digər bir hadisə istehsalat qəzası ilə bağlı olmayıb. Ötən il 1 nəfərin ölümü ilə nəticələnmiş bədbəxt hadisəyə səbəb isə həlak olmuş vətəndaşın işlədiyi müəssisədə əmək və icra intizamının aşağı səviyyədə olmasıdır. Ümumiyyətlə, son iki ildə muxtar respublikanın sənaye məssisələrində baş vermiş qəzalar nəticəsində 4 nəfər dünyasını dəyişib. Bədbəxt hadisələrin idarə və müəssisələr tərəfindən gizlədilməsi hallarına isə rast gəlinməyib. Qeyd edək ki, Əmək Məcəlləsinin və əmək sahəsində digər normativ hüquqi aktların tələblərinə əməl olunmasına dövlət nəzarətini həyata keçirmək məqsədilə 2006-cı ildə regiondakı 123 müəssisədə kompleks araşdırmalar aparılıb. Nəticədə, 118-i dövlət, 5-i isə özəl olan bu müəssisələrdə ümumilikdə 282 halda hüquq pozuntusu aşkarlanıb və onların aradan qaldırılması təmin edilib. Həmçinin, ötən il regionda fəalyyət göstərən idarə və müəssisələrdə, xüsusən də ticarət və iaşə obyektlərində aparılan yoxlamalar zamanı 126 halda gizlədilmiş iş yerləri aşkar edilib. Bu zaman müfəttişliyin vəzifəli şəxsləri tərəfindən metodiki köməklik göstərilərək nümunəvi formada əmək müqavilələri bağlanıb. Bununla yanaşı, ötən il 65-i hüquqi, 269-u fiziki şəxs olmaqla 334 sahibkarlıq subyektində araşdırma aparılıb. Araşdırmalar zamanı 133 halda vətəndaşların əmək haqlarının minimum məbləğinin artırılmasına nail olunub. /APA/