Sosial

Ana səhifə

Sosial

BMT-nin baş katibi Beynəlxalq Ahıllar Günü ilə bağlı müraciət yayıb

27 sentyabr 2007 12:31 (UTC +04:00)

BMT-nin baş katibi Pan Gi Mun 1 oktyabr - Beynəlxalq Ahıllar Günü ilə bağlı müraciət yayıb. BMT-nin Azərbaycandakı nümayəndəliyindən APA-ya verilən məlumata görə, müraciətdə qeyd olunub ki, narahatlıq doğuran statistikaya əsasən dünya əhalisinin təxminən 80 faizi ahıl yaşlarında sosial müdafiədən kənarda qalır: “Davamlı pensiya proqramları və yeni sosial müdafiə tədbirləri vasitəsilə sayı artmaqda olan yaşlı insanlara iqtisadi yardım göstərilməsi yollarının axtarışı, xüsusən də inkişaf etməkdə olan ölkələr üçün olduqca mürəkkəb bir vəzifədir”.
Müraciətdə qeyd olunur ki, ahılların hüquqlarının qorunması və demokratiyanın inkişaf etdirilməsi ilə bərabər yaşlı insanların sosial və iqtisadi inkişafdakı rolu Yaşlanma üzrə Madrid Beynəlxalq Fəaliyyət Planının əsas tərkib hissəsidir: “Bu il biz Madrid Planının qəbul edilməsinin 5-ci ildönümünü qeyd edir və ilk dəfə olaraq onu yenidən nəzərdən keçirərək qiymətləndirmə prosesinə başlayırıq. Builki Beynəlxalq Ahıllar Günü Minilliyin İnkişaf Məqsədləri və BMT-nin inkişafla bağlı daha geniş gündəliyinə uyğun olaraq Madrid Planının həyata keçirilməsindəki irəliləyişlər barədə bütün maraqlı tərəflər arasında müzakirələri stimullaşdırmaq üçün bir fürsətdir”. /APA/