Sosial

Ana səhifə

Sosial

Neftçalanın Cəngən kəndinə üç aydır su verilmir

29 sentyabr 2007 11:50 (UTC +04:00)

Üç aydan artıqdır ki, Neftçala rayonunun Cəngən kəndinə içməli və suvarma suyu verilmir. Bu barədə APA-ya rayon sakini Əlirza Rzayev məlumat verib. Onun sözlərinə görə, kənd sakinləri problemin həlli üçün rayonun bütün aidiyyəti orqanlarına müraciət etsələr də, məsələ həllini tapmayıb. Ə. Rzayev əhalinin məcburən “kaçalka” suyu içdiyini, amma bunun təhlükəli olduğunu deyib: “Həmin suda müxtəlif bakteriyalar var. Ötən il də kənddə eyni problem yaranmışdı və həmin sudan istifadəyə görə mən və həyat yoldaşım malyariya xəstəliyinə tutulmuşduq”. Ə. Rzayev kənd əhalisinin ölkə prezidentinə müraciət edəcəyini bildirib.
Neftçala rayon İcra Hakimiyyətinin ərazi icra nümayəndəsi Əmənulla Ələkbərov APA-ya açıqlamasında Cəngən kəndində su probleminin olduğunu etiraf edib. Onun sözlərinə görə, kəndə su Kür çayından verilir və nasosların biri sıradan çıxdığı üçün əhali susuz qalıb: “Amma ehtiyat nasos var və biz su idarəsinin regional şöbəsinə müraciət etmişik. Yaxın vaxtlarda həmin nasosu işə salacaqlarını bildiriblər”. /APA/