Sosial

Ana səhifə

Sosial

Ötən il Azərbaycanın Ağstafa rayonunda yerləşən keçmiş hərbi bazanın ərazisində 177 270 partlamamış hərbi sursat tapılıb

02 fevral 2008 09:17 (UTC +04:00)

Ötən il “Partlamamış hərbi sursatların (PHS) təmizlənməsi üzrə Saloğlu layihəsi” çərçivəsində Ağstafa rayonunun Saloğlu kəndində yerləşən keçmiş sovet ordusuna məxsus hərbi bazanın ərazisində 2 511 637 kvadrat metr ərazi təmizlənib. Bu barədə APA-ya Azərbaycan Ərazilərinin Minalardan Təmizlənməsi üzrə Milli Agentliyin (ANAMA) PHS əməliyyatları üzrə mütəxəssisi Pərviz Gidayev məlumat verib. P. Gidayevin sözlərinə görə, ötən il Saloğluda 810 611 kvadrat metr yeraltı, 1 701 026 kvadrat metr yerüstü təmizləmə işləri aparılıb. Əməliyyatlar zamanı 177 270 ədəd müxtəlif PHS tapılıb. Həmin sursatlardan 64 588-i partladılma, 6354-ü yandırma üsulu ilə məhv edilib. Eyni zamanda 4 944 ədəd ağ fosforlu sursat və 7200 kq sursat qırıntısı və trotil komponentləri zərərsizləşdirilib.
Cari ilin yanvar ayında hava şəraitinin sərt keçməsi ilə əlaqədar əməliyyatların yalnız 5 gün davam etdiyini deyən P. Gidayev nəticədə cəmi 11 950 kvadrat metr ərazinin təmizləndiyini vurğulayıb: “Ərazidə, əsasən yeraltı təmizləmə əməliyyatları aparılır. Metal tullantıları çox olduğundan lokatorlarla işləmək həddən artıq çətinləşib”.
Qeyd edək ki, layihə çərçivəsində 2006-cı ilin yanvar ayından bu günədək Saloğluda ümumilikdə 5 683 769 kvadrat metr ərazi təmizlənib. Əməliyyatlar zamanı 289 116 ədəd PHS tapılıb. Onlardan 127 257-si partladılma, 8110-u yandırma üsulu ilə məhv edilib, 20 min ağ fosforlu sursat zərərsizləşdirilib. /APA/