Sosial

Ana səhifə

Sosial

Lənkəranda 2007-ci ilin yekunlarına və qarşıda duran vəzifələrə həsr olunmuş tədbir keçirilib

07 fevral 2008 16:48 (UTC +04:00)

Lənkəran.Ağəddin Babayev-APA. Bu gün Lənkəran Şəhər İcra Hakimiyyəti (ŞİH) başçısı yanında fəaliyyət göstərən şuranın 2007-ci ilin yekunlarına və qarşıda duran vəzifələrə həsr olunmuş geniş iclası keçirilib. APA-nın cənub bürosunun məlumatına görə, iclasda Lənkəran ŞİH-nin başçısı Süleyman Mikayılov 2007-ci ildə rayonun sosial-iqtisadi inkişafı sahəsində görülmüş işlərin yekunu və qarşıda duran vəzifələr barədə məruzə ilə çıxış edib. Onun sözlərinə görə, ötən il Lənkəranda ümumi məhsul istehsalı 11,9 faiz artaraq, 131,4 milyon manat təşkil edib, yeni yaradılmış və fəaliyyəti bərpa olunmuş müəssisələrdə 5027 iş yeri açılıb ki, bunun da 2960-ı daimi iş yeridir. Keçən il rayonda əhalinin gəlirləri 31,3 faiz, xərcləri 26,7 faiz artıb. Rayon üzrə orta aylıq əmək haqqı 42,1 faiz yüksələrək 102 manat olub. İl ərzində ümumi sahəsi 34714 kv/metr olan yeni yaşayış evləri inşa edilib. 2006-cı illə müqayisədə fərdi mənzil tikintisi 30 faiz artıb.
Heydər Əliyev Fondunun vəsaiti hesabına Osman Mirzəyev adına qarışıq tipli uşaq evinin əsaslı təmiri başa çatdırılıb, Liman şəhərində 1200, Bürcəli kəndində 100 yerlik yeni binaları, dövlət vəsaiti hesabına Şirinsu kən orta məktəbində 120 yerlik 6 əlavə sinif otağı, xüsusi internat məktəbində akt zalı, emalatxana və qazanxana tikilərək istifadəyə verilib, şəhər 5 saylı orta məktəbi əsaslı təmir edilib. Ötən il Mərkəzi Rayon Xəstəxanasının reanimasiya və uşaq cərrahiyyə şöbələri əsaslı təmir edilib, Şovu, Qurunba, Şağlakücə, Xarxatan kəndlərində, Balıqçılar qəsəbəsində yeni feldşer-mama məntəqələri və həkim ambulatoriyaları tikilib. Əvvəlki illərlə müqayisədə keçən il yoluxucu xəstəliklərə tutulma halları azalıb. 2007-ci ildə şəhər büdcəsinin mədaxili 17,8 milyon manat icra olunub ki, bu da 2006-cı ildən 41,3 faiz çoxdur. Yığıncaqda çıxış edən fövqəladə hallar naziri Kamaləddin Heydərov ölkədə aparılan sosial-iqtisadi islahatlardan, əhalinin rifahının yaxşılaşdırılması istiqamətində həyata keçirilən tədbirlərdən danışıb. K. Heydərov il ərzində regionların sosial-iqtisadi inkişafına yönəldilən layihələrdən söz açaraq, Lənkəranın da bütün digər bölgələr kimi daim diqqət mərkəzində olduğunu, burada sürətli inkişafın getdiyini vurğulayıb.
Tədbirdə Milli Məclisin Lənkərandan seçilmiş deputatları da iştirak ediblər.