Sosial

Ana səhifə

Sosial

I Qarabağ müharibəsinin veteranları yeni veteran vəsiqəsi və pul kompensasiyalarını ala bilmirlər

09 aprel 2008 10:20 (UTC +04:00)

Bakı. Rəşad Süleymanov APA. 1992-1994-cü illərdə Azərbaycan ərazilərinin müdafiə olunmasında, Dağlıq Qarabağda gedən hərbi əməliyyatlarda iştirak etmiş bəzi vətəndaşlar hərbi komissarlıqlardan yeni veteran vəsiqəsi ala bilmirlər. Azərbaycanın müxtəlif rayonlarından APA-ya müraciət edən müharibə veteranları ötən ildən sənədlərin təkrar dəqiqləşdirilməsində problemlə qarşılaşdıqlarını bildiriblər. Onların sözlərinə görə, hərbi komissarlıqlar sənədləri dəqiqləşdirmək üçün təqdim olunan sorğuları cavablandırmır, veteranlara lazım olan sənədlərin verilməsi ləngidilir. Bu problemlə ən çox qarşılaşanlar isə vaxtilə könüllü özünümüdafiə taborlarında döyüşənlərdir. Hərbi komissarlıqlar özünümüdafiə taborlarının sonradan ləğv edildiyini və sənədlərin itdiyini əsas gətirərək, həmin şəxslərə veteran statusu almaq üçün tələb olunan sənədləri vermir. 1992-1993-cü illərdə Füzuli rayonunda yerli özünümüdafiə taborunda xidmət etmiş Azər Süleymanov atəşkəs haqqında saziş imzalanandan bu günədək dəfələrlə Füzuli Rayon Hərbi Komissarlığına müraciət etsə də, veteran statusu ala bilmədiyini bildirib. Komissarlıq əvvəlcə onun xidmət etdiyi taborun ləğv edildiyini, sənədlərin itdiyini əsas gətirərək, veteran vəsiqəsi verilməsinin qeyri-mümkün olduğunu bəyan edib. Məsələ ilə bağlı qarnizon Hərbi Prokurorluğu araşdırma apararaq A. Süleymanovun həqiqətən döyüşlərdə iştirak etdiyini təsdiqləyib və ona veteran vəsiqəsi verilməsini məqsədəuyğun sayıb. Bundan sonra Müdafiə Nazirliyinə göndərilən sorğular isə bir ildən çoxdur cavablandırılmır.
Azərbaycan Vətən Müharibəsi Veteranları Birliyinin sədri Füzuli Rzaquliyev APA-ya yüzlərlə keçmiş döyüşçünün bu cür problemlə üzləşdiyini söyləyib: “O vaxt saxta yollarla veteran statusu alanlar da çox idi. Onlar bu statusu icra hakimiyyətlərinin təqdimatı ilə alırdılar. Burada komissarlıqların da müəyyən maraqlarının olması istisna deyil”. F. Rzaquliyevin sözlərinə görə, digər problem 1991-1994-cü illərdə bəzi şəxslərin hərbi xidmətə birbaşa hərbi hissə komandirinin daxili əmri ilə götürülməsi və azad edilməsi ilə bağlıdır. Yəni bu zaman onlar hərbi xidmətə komissarlıqlar tərəfindən çağırılmadan, birbaşa hərbi hissədə qeydiyyata düşüblər. Veteranların sayının təkrar dəqiqləşdirilməsi ilə əlaqədar artıq bir ildən çoxdur ləğv edilmiş güzəşt və imtiyazların əvəzinə verilən 15 manat pul kompensasiyasının ödənməsi də dayandırılıb.
Müdafiə Nazirliyi mətbuat xidmətinin əməkdaşı, mayor İlqar Verdiyev isə APA-ya açıqlamasında veteranların siyahısının dəqiqləşdirilməsi ilə bağlı hər hansı problemlərin yaranmadığını bildirib: “Müraciətlər uzağı bir ay müddətində araşdırılır və cavablandırılır”.
Respublika Hərbi Komissarlığının ictimai-siyasi işlər şöbəsinin rəisi Rasim Sadıqov da öz növbəsində komissarlıqlarda süründürməçiliyə yol verildiyinə dair deyilənləri təkzib edib. Onun sözlərinə görə, problemlə üzləşənlər döyüşlərdə iştirak etməyən və ya vaxtilə icra hakimiyyətlərinin təqdimatı əsasında veteran vəsiqəsi alanlardır. R. Sadıqov deyib ki, müraciətlər bir ay ərzində cavablandırılır və ləngimələrdə komissarlıqların heç bir günahı yoxdur.