Sosial

Ana səhifə

Sosial

2008-ci ilin may ayı ərzində Azərbaycanın 1 554 974 kv/m ərazisi yoxlanılıb və mina və partlamamış hərbi sursatdan təmizlənib

09 iyun 2008 10:10 (UTC +04:00)

Bakı. Rəşad Süleymanov - APA. 2008-ci ilin may ayı ərzində Azərbaycanın 1 554 974 kv/m ərazisi yoxlanılıb və mina və partlamamış hərbi sursatdan (PHS) təmizlənib. Ötən ay 4009 PHS aşkar edilərək zərərsizləşdirilib. Azərbaycan Ərazilərinin Minalardan Təmizlənməsi üzrə Milli Agentliyin (ANAMA) mətbuat xidmətindən APA-ya daxil olan məlumata görə, əməliyyatlarda 339 nəfər, 5 mexaniki minatəmizləmə maşını və 30 minaaxtaran it iştirak edir. İndiyədək Azərbaycanın ümumilikdə 69 203 955 kv/m ərazisi təmizlənib, 310 898 mina və PHS tapılaraq zərərsizləşdirilib.
Agentlik tərəfindən təmizləmə əməliyyatları Tərtər, Ağdam, Füzuli, Goranboy, Xocavənd Gəncə və Ağstafa rayonlarında aparılır.
Ötən ay 1 mina/PHS hadisəsi qeydə alınıb. Mayın 19-da Xocavənd rayonunun Tuğ kənd sakini, Beyləqan rayonunun Allahyarlı kəndində məskunlaşan 1985-ci il təvəllüdlü Vəliyev Əhəd Yusif oğlu Qarasu ərazisində mal-qara otararkən atla tank əleyhinə minaya düşüb və partlayış nəticəsində hər iki ayağını dizdən yuxarı itirib.
Piyadalar Əleyhinə Minaların Qadağan Olunması uğrunda Azərbaycan Kampaniyası (AzJBL) direktorunun may ayında ANAMA-ya göndərdiyi məlumata əsasən, Lənkəran Hərbi Komissarlığından həqiqi hərbi xidmətə çağırılmış sıravi Kərimov Namiq Vəliağa oğlu 2008-ci il martın 27-də Füzuli rayonunda yerləşən N saylı hərbi hissədə tapşırığı yerinə yetirərkən PMN tipli piyada əleyhinə minaya düşərək aşağı ətraflarından birini itirib. Zərərçəkənin anadan olduğu tarix və hadisəyə düçar olduğu yer barədə məlumat əldə etmək mümkün olmayıb.
2001-ci ilin sentyabrından müxtəlif mənbələrə istinadən aparılan statistikaya görə isə Azərbaycan ərazisində qeydə alınmış 100 hadisədə 57 nəfər həlak olub, 136 nəfər müxtəlif dərəcəli xəsarət alıb.

ANAMA_mina