Sosial

Ana səhifə

Sosial

Azərbaycanın ən gənc Milli qəhrəmanı Cavanşir Rəhimova həsr olunan filmin təqdimatı olub - FOTO

Azərbaycanın ən gənc Milli qəhrəmanı Cavanşir Rəhimova həsr olunan filmin təqdimatı olub - <span style="color: red;">FOTO

03 yanvar 2014 09:27 (UTC +04:00)

Bakı-APA. Millət vəkili Qənirə Paşayevanın rəhbərlik etdiyi Avrasiya Beynəlxalq Araşdırmalar İnstitutu İctimai Birliyinin təşəbbüsü və təşkilatçılığı ilə Ermənistanla ön cəbhədə yerləşən N saylı hərbi hissədə Azərbaycanın ən gənc Milli qəhrəmanı Cavanşir Rəhimovun həyatı, döyüş və qəhrəmanlıq yolundan bəhs edən “Cavanşir” filminin təqdimatı olub.

APA-nın xəbərinə görə, Mədəniyyət və Turizm Nazirliyinin dəstəyi ilə “Yaddaş” sənədli filmlər studiyasında “Azərbaycanın Milli Qəhrəmanları” silsiləsindən hazırlanan sənədli filmin rejissoru Kamalə Musazadədir. Təqdimat mərasimində şəhidlərin xatirəsi bir dəqiqəlik sayğı duruşu ilə yad edildikdən sonra hərbi hissənin rəhbəri, polkovnik Mais Barxudarov qəhrəmanlar haqqında filmlərin hərbi hissələrdə təqdimatını yüksək qiymətləndirib. Azərbaycanın Milli qəhrəmanı Cavanşir Rəhimovun həyat və qəhrəmanlıq yolundan danışan millət vəkili Qənirə Paşayeva qəhrəmanlarımız haqqında filmlərin vaxtaşırı hərbi hissələrdə yeni gələn əsgərlərə göstərilməsinin vacibliyinə toxunub: “Cavanşir Rəhimov şəhidlik zirvəsinə yüksələndə və Milli qəhrəman adına layiq görüləndə 19 yaşında, yəni sizin çoxlarınız yaşında idi. Bu igidlik bizim gənclər üçün, hamımız üçün örnək olmalıdır”.

Sonra filmin rejissoru Kəmalə Musazadə çıxış edərək film barədə və onun gənclər üçün önəmi barədə danışıb və gəncləri bu cür qəhrəmanlardan örnək götürməyə çağırıb. Sənədli film əsgərlər tərəfindən böyük maraqla qarşılanıb. Filmlə bərabər Milli Qəhrəmanımız Cavanşir Rəhimovla bağlı məlumatların əks olunduğu materiallar da əsgərlərə paylanılıb və filmin nüsxələri tez-tez hərbi hissəyə yeni gələn əsgərlərə nümayiş olunmaq üçün hərbi hissəyə hədiyyə edilib.

Qeyd edək ki, Azərbaycanın ən gənc Milli Qəhrəmanı Cavanşir İzzət oğlu Rəhimov 5 iyun 1973-cü ildə Qax rayonunda anadan olub. 1992-ci il mayın 26-da C. Rəhimov könüllü olaraq hərbi xidmətə gedib. Yüksək fiziki hazırlığına görə onu Zabrat Aviasiya müəssisəsinin ilk hərbi vertolyot eskadrilyasına qəbul ediblər. İyunun 12-də Cavanşir Rəhimov Qaladakı N saylı hərbi hissədən vertolyotdan atıcı kimi Qarabağ bölgəsinə yollanıb. Avqustun 6 da Ağdərədə gedən ağır səma döyüşlərindən birində Cavanşir Rəhimov qəhrəmanlıqla şəhid olub. O, Bakıdakı Şəhidlər xiyabanında dəfn edilib. Şəhid Cavanşir Rəhimova 1992-ci ildə Azərbaycanın Milli Qəhrəmanı adı verilib.