Bakı. Şəhriyar Əlizadə - APA. Ombudsmanın İşgəncələrin qarşısının alınması üzrə Milli Preventiv Qrupunun (MPQ) üzvləri bir sıra rayon polis şöbələrinin (RPŞ) müvəqqəti saxlama yerlərinə (MSY) və psixiatriya müəssisələrinə başçəkmələr həyata keçiriblər.
Ombudsman Aparatından APA-ya verilən məlumata görə, Hacıqabul, İmişli, Beyləqan, Ağcabədi, Bərdə, Tərtər, Yevlax, Ucar, Zərdab RPŞ-lərin MSY-lərinə, hazırda MSY-ləri olmayan Kürdəmir və Ağdam RPŞ-lərinə, habelə Kürdəmir Rayonlararası Psixiatriya Xəstəxanasına başçəkmələr zamanı bu müəssisələrdə saxlanılma şəraiti, rəftar və sənədləşmə araşdırılıb. Araşdırma zamanı əksər MSY-lərin standartlara uyğun olması müəyyən edilib. Qəbul edilmiş saxlanılan şəxslər müəssisə əməkdaşlarının onlara qarşı rəftarından şikayət etməyiblər. Eyni zamanda İmişli və Beyləqan RPŞ MSY-lərin rəhbərliyinə şərait və sənədləşmə ilə bağlı müvafiq tövsiyələr verilib.
Yaxın günlərdə Kürdəmir RPŞ MSY-nin yeni binası istifadəyə veriləcək, Zərdab RPŞ-nin yeni müasir standartlara uyğun binasının tikintisi bitmək üzrədir, Yevlax RPŞ üçün isə yeni binanın tikintisinə yaxın vaxtlarda başlanacaq.
Beyləqan və İmişli RPŞ-lərin MSY-lərində saxlanma şəraiti, Kürdəmir RPŞ-də isə sənədləşmə ilə bağlı pozuntularla əlaqədar Daxili İşlər Nazirliyinə müraciət olunub.
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
