Sosial

Ana səhifə

Sosial

TQDK XI siniflər üzrə keçirilən monitorinq imtahanlarının nəticələrini Bakı şəhəri üzrə Təhsil İdarəsinə təqdim edib

21 may 2013 12:05 (UTC +04:00)

Bakı. Könül Kamilqızı – APA. Bu il Tələbə Qəbulu üzrə Dövlət Komissiyası (TQDK) tərəfindən ilk dəfə olaraq keçirilən monitorinq imtahanlarının ilkin nəticələri açıqlanıb. APA-nın xəbərinə görə, TQDK sədri Məleykə Abbaszadə keçirdiyi mətbuat konfransında bildirib ki, XI siniflər üzrə keçirilən monitorinq imtahanlarının nəticələri artıq Bakı şəhəri üzrə Təhsil İdarəsinə təqdim edilib. Onun sözlərinə görə, XI siniflər üzrə monitorinq imtahanlarında şagirdlərin “Riyaziyyat” fənni ilə müqayisədə “Ana dili” fənnindən daha yaxşı nəticələri var: “Ən zəif nəticələr isə fizika fənnindəndir. Bu da əvvəldən gözlənilən idi. V sinif üzrə isə bu nəticələr hələki yoxlanılır. Orada yazılı imtahan var idi deyə onun həm Bakı, həm də digər rayonlarda aparılması çox vaxt aparır. V siniflə əlaqədar məsələni ciddi araşdıracağıq ki, kurrikuluma əsasən təhsil alan şagirdlər dövlət standartlarına uyğun səviyyədə oxuyublar, ya yox. Dövlət standartları Nazirlər Kabineti tərəfindən təsdiqlənib. Suallar da bu dövlət standartlarına uyğun olaraq tərtib edilib. Bu hələki yoxlama mərhələsindədir. Monitorinq imtahanlarının nəticələrinə əsasən, regionlarda elmi-praktik konfrans keçiriləcək və birgə müzakirələr aparacaq. İyun ayında bütün respublika üzrə keçirilən həm XI, həm də IX sinif üzrə monitorinq imtahanlarının nəticələrinin tam yoxlanması başa çatacaq”.

monitorinq imtahanları