Bakı. Vüsal Nəbiyev – APA-Economics. Rusiyanın lizinq şirkəti “İlyuşin finans” ilə “Azərbaycan Hava Yolları” QSC (AZAL) arasında 10 ədəd “МS-21” təyyarələrinin alışı ilə bağlı memorandum imzalanıb.
“APA-Economics”in “TASS” agentliyinə istinadən verdiyi xəbərə görə, müqaviləni Rusiya baş nazirinin birinci müavini Dmitri Roqozin və Azərbaycan baş nazirinin birinci müavini Yaqub Eyyubov imzalayıb.
Bundan başqa, müqaviləni “İlyuşin Finans Ko” MMC-nin baş direktoru Aleksandr Rubçov və AZAL prezidenti Cahangir Əsgərov imzalayıb.
“Müqavilənin müddəti 28 fevral 2017-ci ilə kimidir və düşünürəm ki, bu zamana qədər müqavilənin bütün detallarını müzakirə etməliyik”, - deyə C.Əsgərov bildirib.
AZAL prezidenti əlavə edib ki, təyyarələrin hansı qiymətə alınması, nə cür güzəştlər etmək mümkündür və s. detallar dəqiqləşdirilməlidir.
“Biz Bakıda təlim mərkəzinin açmağı da istisna etmirik”, - deyə A.Rubçov qeyd edib.
Qeyd edək ki, hal-hazırda “МS-21” sərnişin təyyarəsi “İrkut” şirkətində yığılır. Təyyarələr 2018-ci ilin 4-cü rübündə Azərbaycana göndəriləcək.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
