Bakı. Yeganə Laçınzadə - APA-Economics. “Son 3 ayda manatın məzənnəsi sabit idi. Hal-hazırda məzənnə tələb-təklif əsasında formalaşır”.
“APA-Economics” xəbər verir ki, bunu Bakıda keçirilən VII Beynəlxalq Sığorta Forumunda (AIIF-2016) “Kapital Bank”ın İdarə Heyətinin sədr müavini Fərid Hüseynov deyib.
Onun sözlərinə görə, devalvasiya nəticəsində manat dəyərdən düşüb. “Əmanətlər üzrə dollarlaşma artıb. Buna baxmayaraq, sənaye daha stabil istiqamətdə davam etməyə başlayıb”, - deyə F. Hüseynov qeyd edib.
F. Hüseynov “Kapital Bank” haqqında ümumi məlumatlar da verib: “Bankın ümumi aktivləri 2,3 milyard manat, ümumi kapitalı isə 247 milyon manat təşkil edir. Hal-hazırda ”Kapital Bank” 2,7 milyon müştəri bazasına malikdir. Ölkə daxilində 90 filialımız var. "Kapital Bank" ölkənin bütün regionlarında təmsil olunan bankdır”.