Bakı-APA. BMT-nin Suriya üzrə xüsusi elçisi Staffan de Mistura Vyanada keçiriləcək danışıqlarda iştirak edəcək.
APA-nın RİA Novosti agentliyinə istinadən verdiyi məlumata görə, bu barədə de Misturanın mətbuat katibi Cessi Şahin bildirib.
“Suriya üzrə xüsusi elçi Staffan de Mistura oktyabrın 30-da Vyanada keçirilən danışıqlarda BMT-ni təmsil edəcək”, deyə C.Şahin vurğulayıb.
Rusiya, ABŞ, Səudiyyə Ərəbistanı və Türkiyənin xarici işlər nazirlərinin Suriyada münaqişənin nizamlanmasına dair növbəti görüşü oktyabrın 29-da Avstriyanın paytaxtı Vyanada baş tutacaq. Oktyabrın 30-da isə danışıqlara bir sıra dövlətlərin (İran, İraq, Misir, Qətər) nümayəndələrinin də qatılacağı gözlənilir.
Qeyd edək ki, “dördlük” formatında son danışıqlar Vyanada oktyabrın 23-də baş tutmuşdu.