Bakı-APA. Azərbaycanın Macarıstandakı səfirliyində Azərbaycan Respublikası Prezidenti yanında qeyri-hökumət təşkilatlarına dövlət dəstəyi şurası – “Xan Şuşinski fondu” ilə birlikdə “Xaricdə yaşayan azərbaycanlılar arasında vətənpərvərliklə bağlı tədbirlərin keçirilməsi” silsiləsindən xalq musiqisindən ibarət konsert proqramı təşkil olunub.
Səfirlikdən APA-ya verilən məlumata görə, konsertdə Azərbaycan xalq artisti, tanınmış tarzən Fikrət Verdiyev, gənc kamança ustası Habil Əliyev, populyar xanəndələr Ehtiram Hüseynov və Sevinc Sarıyeva iştirak ediblər.
Konsertdən əvvəl səfir Vilayət Quliyev musiqi ustalarını və tamaşaçıları salamlayaraq Azərbaycan mədəniyyətinin xarici ölkələrdə təbliği, diaspora üzvlərinin vətənlə mədəni-mənəvi bağlarının gücləndirilməsi baxımından bu cür tədbirlərin böyük əhəmiyyət daşıdığını vurğulayıb. Səfir Azərbaycanın dövlət müstəqilliyinin 25 illiyi ərəfəsində baş tutan tədbirin müstəqillik illərində digər sahələrlə bir sırada musiqi mədəniyyətimizin də böyük inkişaf yolu keçdiyinin sübutu olduğunu bildirib.
Xan Şuşinski Fondunun prezidenti, böyük xalq sənətkarının qızı Bəyimxanım Verdiyeva-Cavanşirova öz çıxışında Fond xətti ilə son illərdə bir sıra Avropa ölkələrində həyata keçirilən mədəni-kütləvi tədbirlər haqqında məlumat verib. Böyük maraqla dinlənən və dəfələrlə alqışlarla kəsilən konsertdə muğamlar, xalq mahnıları, ayrı-ayrı bəstəkarların əsərləri səsləndirilib. Konsertdə Macarıstan paytaxtında yaşayan və təhsil alan azərbaycanlılar, diplomatik korpusun nümayəndələri, macar musiqi xadimləri iştirak ediblər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
