Bakı – APA. Bu gün milli komandaların növbəti FİFA reytinqi açıqlanıb. Apasport.az saytının məlumatına görə, Azərbaycan yığması siyahıda irəliləyib.
Sonuncu dəfə sentyabrın 3-də açıqlanan cədvəllə müqayisədə bu dəfə bəzi dəyişikliklər baş verib. Bu da hesabat dövründə DÇ-2018 və AVRO-2016-nın seçmə oyunlarının keçirilməsi ilə bağlıdı.
Dəyişikliklər Azərbaycan millisinə də təsir edib. Son 4 həftədə meydana 2 matçda qüvvəsini sınayan Robert Prosineçkinin yetirmələri 37 xal qazanıb. Xorvatiya ilə evdə (0:0), Malta ilə (2:2) səfərdə əldə olunan bərabərliklər ötən ay 291 xala malik millimizin əmsalını 328-ə çatdırıb. Bu isə komandamızın 110-cu pillədən 105-ciyə yerə şərik olmasına imkan verib.
Liviya ilə eyni xala malik yığmamız son 28 gündə Mozambik, Efiopiya, Zimbabve, Kipr, Litva, Niger, Syerra-Leone və Makedoniyanı arxada qoyub. Benin, Nikaraqua, Mavritaniya və Liberiya isə daha böyük sıçrayışla millimizi də keçib.
Millimiz və “qonşuları”
101 (96). Malavi - 339
102 (100). Oman - 338
103 (90). Latviya - 335
104 (102). Kanada - 333
105 (110). AZƏRBAYCAN – 328
105 (112). Liviya - 328
107 (95). Mozambik - 327
108 (103). Efiopiya - 315
109 (108). Zimbabve - 313
110 (147). Gürcüstan - 308
FİFA reytinqinin ilk “onluğ”unda da dəyişiklik diqqət çəkir. Almaniya 2-ci pilləyə qayıdıbsa, Portuqaliya 4-cü yeri ələ keçirib. İlk “onluğ”a qayıdan İspaniya Rumıniyanı buradan çıxarıb.
İlk “onluq”
1 (1). Argentina – 1419
2 (3). Almaniya – 1401
3 (2). Belçika – 1387
4 (6). Portuqaliya – 1235
5 (4). Kolumbiya – 1228
6 (11). İspaniya - 1223
7 (5). Braziliya – 1204
8 (9). Uels - 1195
9 (8). Çili – 1177
10 (10). İngiltərə - 1161
Millimizin AVRO-2016-nın seçmə mərhələsindəki 5 rəqibindən Norveç və Malta irəliləyib. Şimallılar 35 pilləlik sıçrayışa nail olub. Xorvatiya, İtaliya və Bolqarıstan isə geriləyib.
AVRO-2016-nın seçmə mərhələsinin H qrupu
16 (14). Xorvatiya – 965
17 (16). İtaliya – 962
34 (69). Norveç - 739
78 (68). Bolqarıstan - 414
157 (160). Malta – 164
DÇ-2018-in seçmə mərhələsindəki rəqiblərimiz arasında Almaniya, Çexiya, Norveç və Şimali İrlandiya irəliləyib. Yalnız San-Marino mövqeyini bir az da pisləşdirib.
DÇ-2018-in seçmə mərhələsi, Avropa zonası üzrə C qrupu
2 (3). Almaniya – 1401
15 (20). Çexiya - 983
34 (69). Norveç - 739
35 (41). Şimali İrlandiya - 724
196 (193). San-Marino - 35
Qeyd edək ki, qonşu Türkiyə yığması siyahıda hesabında olan 717 xalla 9 pillə irəliləyib. “Ay-ulduzlular” bu cədvəldə 37-ci pilləyə yüksəlib.