Bakı – APA. “Avropa Liqasının qrup mərhələsində mübarizə aparmaq asan deyil. “Qarabağ”a məğlubiyyəti təsadüf sayıram”. Apasport.az xəbər verir ki, bu sözləri Ukraynanın “Dnepr” klubunun yarımmüdafiəçisi Valeri Fedorçuk deyib.
Hazırda icarə əsasında “Volın”da çıxış edən futbolçu “Dnepr”in “Qarabağ”a 0:1 hesabı ilə uduzmasına təəssüflənir. O bildirib ki, qrupdan növbəti mərhələyə çıxmağa ən real namizəd “Dnepr” və “İnter”di: “Azərbaycan klubuna məğlubiyyət gözlənilməz idi. Heç kim inanmazdı ki, “Dnepr” doğma meydanda uduzacaq. Əslində, komandamız yaxşı oynadı, xeyli qol epizodu yaratdı. Amma əlinə düşən imkanları boşa verdi. Biz “İnter”lə birlikdə qrupdan çıxmağa ən real namizədik. İndi “Dnepr” Bakıda “Qarabağ”ı məğlub etməlidi. “Sent-Etyen” və “İnter”dən də xal almaq lazımdı. Belə olan halda, qrupdan çıxa biləcəyik. Əslində, Ukrayna klubunun buna gücü çatır. “Qarabağ” üzərində qazanılan qələbə Avroliqada uğur qazanmağımız üçün stimul olacaq”.
Fedorçuk qeyd edib ki, “Qarabağ” güclü komanda olsa da, “Dnepr”dən zəifdi: “Qarabağ” yaxşı komandadı, heyətində səviyyəli legionerlər oynayır, amma bizdən zəifdi. Məncə, “Dnepr” Bakıda rəqibini məğlub edəcək. Sadəcə, “Qarabağ” tarixində ilk dəfə qrupa düşüb və motivasiyaları çox yüksəkdi. Buna görə də yaxşı oyun göstərirlər”.
Qeyd edək ki, “Qarabağ” – “Dnepr” matçı noyabrın 6-da Tofiq Bəhramov adına Respublika stadionunda baş tutacaq.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
