Bakı. Aynur Əliyeva - APA-Economics. “Noyabrın 1-dən “Azərbaycan Hava Yolları” QSC-nin (AZAL) bütün beynəlxalq müntəzəm uçuşlar Heydər Əliyev Beynəlxalq hava limanının yeni 1 saylı terminalından həyata keçiriləcək. Belə olduqda isə təyyarələrin qəbulunda vaxt sıxlığı yaranacaq. Bununla əlaqədar olaraq, Bakı-Krasnoyarks-Bakı istiqamətində uçuşları həyata keçirən Rusiyanın “Taymır” (“NordStar Airlines”) aviaşirkəti AZAL-ın təqdim etdiyi yeni vaxtla razılaşmır”.
Bunu “APA-Economics”ə AZAL-ın xidmət rəisi Məhərrəm Səfərli bildirib.
M. Səfərlinin sözlərinə görə, “Taymır” aviaşirkətinə təklif olunub ki, şirkətə məxsus təyyarələr həftənin çərşənbə günləri saat 14:20-də Bakıya eniş etsin, 15:50-də isə uçuşu yerinə yetirsin. Lakin qarşı tərəf AZAL-ın təklifini qəbul etməyib.
Xidmət rəisi əlavə edib ki, "Taymır" AZAL-ın təklifini qəbul etdiyi təqdirdə yenidən uçuşları bərpa edə biləcək.
Qeyd edək ki, Rusiyanın “Taymır” aviaşirkəti 2012-ci ilin martından Bakı-Krasnoyarks-Bakı istiqamətində uçuşlar yerinə yetirir. Lakin oktyabrın 29-da şirkət aviareysini yerinə yetirə bilməyib. Sərnişinlərə isə biletin qaytarılması və ya uçuş vaxtının başqa tarixə keçirilməsi təklif edilib.
“Taymır”ın rəsmi məlumatına görə, 2014-2015-ci illər payız-qış dövrünün uçuş cədvəlinin razılaşdırılması zamanı Azərbaycan tərəfi son anda birtərəfli qaydada Rusiya şirkətinin uçuşuna icazə verilməsini rəsmiləşdirməkdən imtina edib.
Onu da əlavə edək ki, Bakı-Krasnoyarks-Bakı marşrutu üzrə uçuşlar həftənin I günü saat 06:30-da və III günü 16:20-də yerinə yetirilir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
