Xarici siyasət

Ana səhifə

Xarici siyasət

ATƏT⁄DTİHB-nin yeni rəhbəri: “Əsas məsələ Seçki Məcəlləsinin necə həyata keçirilməsidir” - EKSKLÜZİV

ATƏT⁄DTİHB-nin yeni rəhbəri: “Əsas məsələ Seçki Məcəlləsinin necə həyata keçirilməsidir” - <font color=red>EKSKLÜZİV</font>

29 iyul 2008 13:01 (UTC +04:00)

- ATƏT/DTİHB və Avropa Şurasının Venesiya Komissiyası Azərbaycanın Seçki Məcəlləsinə edilmiş düzəlişlərlə tam razı deyil. Bu məcəllə ilə azad və ədalətli seçkilərin keçirilməsinin mümkünlüyünə inanırsınızmı?

- ATƏT/DTİHB Venesiya Komissiyası ilə birgə bu yaxınlarda Azərbaycanın Seçki Məcəlləsinə düzəlişlərə dair fikirlərini bildirib. Müvafiq şəkildə həyata keçiriləcəyi təqdirdə, bəzi düzəlişlərin seçki prosesini yaxşılaşdırmaq imkanı var. Lakin qanunun bəzi aspektləri mövcuddur ki, onların təkmilləşməsinə ehtiyac duyulur. Bu, xüsusilə seçki komissiyalarının tərkibinə və seçki kampaniyasının keçirilməsinə aiddir. Əsas məsələ Seçki Məcəlləsinin necə həyata keçirilməsidir. Mən inanıram ki, istək olarsa, dövlət orqanları demokratik seçkilər keçirə bilər.

- Azərbaycan sərbəst toplaşmaya dair yeni qanun qəbul edib. Lakin müxalifət dövlət orqanlarını bu qanunu həyata keçirmək niyyətində olmamaqda günahlandırır. Sizcə, bu, seçkiqabağı duruma necə təsir göstərəcək?

- Sərbəst toplaşma həm rəsmi seçki kampaniyası zamanı, həm də kampaniya qabağı dövr üçün əhəmiyyətli məsələdir. Venesiya Komissiyasının qiymətləndirməsinə görə, hüquqi durumun indi yaxşılaşdırıldığı bir dövrdə ümid edirəm ki, dövlət orqanları tərəfindən onun həqiqi mənada təcrübədə tətbiq edilməsi vətəndaşların dinc şəraitdə toplaşmaları və siyasi partiyalar, eləcə də potensial namizədlərin seçicilərə öz baxışlarını çatdırmaları imkanlarının genişləndirilməsini təmin edəcək.

- Uzunmüddətli və qısamüddətli seçki müşahidəçiləri missiyaları Azərbaycana nə vaxt gəlir? Azərbaycan müxalifəti ATƏT-in Ehtiyacların Qiymətləndirilməsi Missiyasına ölkəyə missiya göndərməməyi təklif edib. Bunu necə şərh edə bilərsiniz?

- DTİHB-nin Qiymətləndirmə Missiyası Bakıya son səfəri zamanı bu fikri, eləcə də müşahidəçi missiyasından yararlanmağın lazım olduğu fikrini eşidib. Azərbaycanın dövlət orqanları DTİHB-yə təminat verib ki, prezident seçkiləri seçki prosesindəki təkmilləşdirmələri əks etdirəcək və Azərbaycan ATƏT qarşısında götürdüyü öhdəlikləri yerinə yetirəcək. DTİHB rəsmi dəvət aldıqdan sonra missiya haqqında daha dəqiq məlumatlar verə biləcək.

- Azərbaycanda üç jurnalist və daha bir neçə tanınmış şəxs həbsdədir. Sizcə, bu fakt azad və ədalətli seçkilərin keçirilməsinə necə təsir edəcək?

- Azad mətbuat demokratik prinsiplərə uyğun seçkilərin keçirilməsində əsas rol oynayır. Bu, kifayət qədər narahatlıq doğuran məsələdir. DTİHB bu baxımdan Mətbuat Azadlığı üzrə ATƏT nümayəndəsinin müraciət və tövsiyələrini dəstəkləyir. Seçkiləri Müşahidə Missiyası öz mandatına müvafiq olaraq seçki dövrü ərzində medianın durumunu da qiymətləndirəcək.

- ATƏT, xüsusilə də Sizin ofisiniz Azərbaycanda keçiriləcək seçkilərdən sonra hansı addımları atacaq?

- Bizim vəzifəmiz ATƏT öhdəlikləri əsasında seçkilərin monitorinqini həyata keçirmək və müşahidə etdiklərimiz barədə hesabatla çıxış etməkdir. Yekun hesabatımıza seçkinin hərtərəfli qiymətləndirilməsi, eləcə də gələcəkdə hər hansı mümkün çatışmazlığın necə həll edilə biləcəyinə dair tövsiyələrimiz daxil ediləcək. Bu hesabat dövlət orqanları, eləcə də müvafiq siyasi orqanlar tərəfindən həm Azərbaycanda, həm də beynəlxalq miqyasda gələcək fəaliyyətin əsası kimi xidmət edəcək.

Yanes_Lenarçiç