Xarici siyasət

Ana səhifə

Xarici siyasət

Brüsseldə “NATO+Azərbaycan” formatında görüş keçirilib

17 sentyabr 2008 12:40 (UTC +04:00)

Xarici İşlər Nazirliyinin mətbuat xidmətinin rəhbəri Xəzər İbrahimin APA-ya verdiyi məlumata görə, sözügedən görüş xarici işlər nazirinin başçılığı altında nümayəndə heyətinin iştirakı ilə NATO-nun Şimali Atlantika Şurası çərçivəsində keçirilib. Nümayəndə heyətinin tərkibində Müdafiə Nazirliyi, Milli Təhlükəsizlik Nazirliyi, Dövlət Sərhəd Xidməti, Fövqəladə Hallar Nazirliyi, Daxili İşlər Nazirliyinin Daxili Qoşunlarından yüksək səviyyəli nümayəndələr təmsil olunublar.

Görüşdə çıxış edən Elmar Məmmədyarov Azərbaycanın İPAP-ın yerinə yetirilməsi səviyyəsi və bu sahədə əldə olunan nailiyyətlər barədə iclas iştirakçılarını məlumatlandırıb. O, öz çıxışında həmçinin, Ermənistan-Azərbaycan münaqişəsinin həlli prosesinə toxunaraq bu münaqişənin yalnız Azərbaycanın ərazi bütövlüyü çərçivəsində həll oluna biləcəyini vurğulayıb. Daha sonra nümayəndə heyətinin üzvləri Şimali Atlantika Müqaviləsi Təşkilatının səfirlərini maraqlandıran sualları cavablandırıblar.

Çıxış edən NATO üzv ölkələrinin səfirləri Azərbaycanın ərazi bütövlüyünü birmənalı dəstəklədiklərini bildiriblər. Bir sıra rəsmilər Azərbaycanın strateji dövlət olduğunu vurğulayaraq münasibətlərin inkişaf etməsində maraqlı olduqlarını qeyd ediblər.

XİN başçısı həmçinin NATO-nun baş katibi Yaap de Hoop Sxeffer ilə ikitərəfli görüş keçirib. Görüş zamanı ikitərəfli əməkdaşlığın daha da inkişaf etdirilməsi, İPAP-ın yerinə yetirilməsi, Ermənistan-Azərbaycan münaqişəsi, regionda ümumi təhlükəsizlik vəziyyəti və digər qarşılıqlı maraq doğuran məsələlər müzakirə olunub.

Brüsselə səfəri çərçivəsində nazir Elmar Məmmədyarov eyni zamanda, Avropa Komissiyasının Xarici Əlaqələr və Avropa Qonşuluq Siyasəti üzrə Komissarı xanım Benita Ferrero-Valdner ilə görüşüb. Görüş zamanı tərəflər Avropa Qonşuluq Siyasəti çərçivəsində Avropa İttifaqı-Azərbaycan Fəaliyyət Planının həyata keçirilməsi, Avropa İttifaqı və Azərbaycanın cari münasibətləri, regional proseslər, Ermənistan-Azərbaycan münaqişəsi, enerji təhlükəsizliyi və digər məsələləri müzakirə ediblər.

Elmar Məmmədyarov Ermənistan-Azərbaycan münaqişəsi haqqında danışaraq onun yalnız Azərbaycanın ərazi bütövlüyü çərçivəsində həllinin mümkün olduğunu söyləyib. Xanım Ferrero-Valdner Avropa İttifaqının Azərbaycanın ərazi bütövlüyünü birmənalı dəstəklədiyini qeyd edib.

Elmar Məmmədyarov görüşdə Azərbaycan vətəndaşları üçün viza rejiminin sadələşdirilməsi məsələsini qaldırıb və Aİ rəsmisi məsələni müsbət qarşılayaraq bu təklifi dəyərləndirəcəklərini vəd edib.