Xarici siyasət

Ana səhifə

Xarici siyasət

MDB Parlament Assambleyası Azərbaycanda seçkiləri müşahidə edəcək qrupun təşkilinə başlayıb

17 sentyabr 2008 15:08 (UTC +04:00)

Moskva-APA. Milli Məclisin Azərbaycanda prezident seçkilərinə hazırlıq və seçkilərin keçirilməsinin gedişinin müşahidə edilməsində iştirak etmək barədə təklifi əsasında MDB Parlament Assambleyasının müşahidəçi qrupunun yaradılmasına start verilib. Milli Məclisin mətbuat xidmətindən APA-ya verilən məlumata görə, bu qrup MDB İcraiyyə Komitəsi tərəfindən formalaşdırılan MDB müşahidəçi missiyasının tərkibinə daxil olacaq.
MDB PA-nın şura sədri Sergey Mironovun qərarı ilə Rusiya Federasiya Şurasının sədr müavini Svetlana Orlova MDB PA-dan olan müşahidəçi qrupunun koordinatoru təyin edilib.

Cari ilin avqustun 1-dən MDB Parlament Assambleyasının mənzil qərargahında – Sankt-Peterburqda Azərbaycanda prezident seçkilərinin keçirilməsinin qanunvericilik bazasının beynəlxalq standartlara uyğunluğunu, həmçinin seçki orqanlarının seçkilərə hazırlıq və onun keçirilməsi fəaliyyətini təhlil edən MDB PA-nın Demokratiyanın inkişafı, parlamentarizm və vətəndaşların seçki hüquqlarına riayət olunması üzrə beynəlxalq monitorinq institutunun (DİBMİ) bazasında ekspertlər qrupu fəaliyyət göstərir.

Azərbaycanda seçkilərin uzunmüddətli monitorinqinin aparılmasına MDB PA-ya üzv ölkələrdə Demokratiyanın inkişafı, parlamentarizm və vətəndaşların seçki hüquqlarına riayət olunması üzrə beynəlxalq monitorinq institutunun Bakı filialının əməkdaşları köməklik göstərəcəklər. Gəncə, Lənkəran və Qubada prezident seçkilərində MDB PA-nın müşahidəçi qrupunu informasiya ilə təmin edəcək 6 müstəqil ekspert işə başlayıb.

Hal-hazırda MDB-yə üzv ölkələrdən prezident seçkilərinin monitorinqində iştirak etmək üçün namizədlər, həmçinin qrup üzvlərinin Mərkəzi Seçki Komissiyasında beynəlxalq müşahidəçi qismində qeydiyyatı məsələlərinə baxılır. MDB PA-ya üzv ölkələrdə Demokratiyanın inkişafı, parlamentarizm və vətəndaşların seçki hüquqlarına riayət olunması üzrə beynəlxalq monitorinq institutunun direktoru D.Q. Qladey qurumun Bakı filialına bildirib ki, qrupun tam tərkibi sentyabrın axırınadək formalaşacaq.