Xarici siyasət

Ana səhifə

Xarici siyasət

Azərbaycan XİN: Moskva Bəyannaməsində bizim dəfələrlə vurğuladığımız prinsiplərə zidd heç nə yoxdur

03 noyabr 2008 12:36 (UTC +04:00)

APA-nın məlumatına görə, bu sözləri jurnalistlərə açıqlamasında Azərbaycan Xarici İşlər Nazirliyinin mətbuat katibi Xəzər İbrahim deyib. Sənədin imzalanmasının hansı zərurətdən irəli gəldiyinə dair sualı cavablandıran diplomat bildirib ki, münaqişənin həlli prosesində yeni mərhələyə keçmək üçün zəmin olmalıdır: “İndiyə qədər verilən şifahi bəyanatlardan sonra imzalarla təsdiqlənən bir sənəd olmalı idi. Bəyannamənin ən yüksək səviyyədə imzalanması məhz bu zərurətdən irəli gəlir”.

X. İbrahim Bəyannamənin Azərbaycanı münaqişəni hərbi yolla həll etmək hüququndan məhrum edib-etmədiyi haqda suala cavabında sənədin mahiyyətinin münaqişənin siyasi yolla necə həll oluna biləcəyini göstərməkdən ibarət olduğunu söyləyib: “Təbii ki, münaqişələrin siyasi yolla həlli müəyyən prinsiplərə və müddəalara əsaslanmalıdır. Bu sənəddə də məhz bunlar qeyd olunub. Bəyannamədə bizim dəfələrlə qeyd etdiyimiz məqamlardan kənara çıxan heç bir maddə yoxdur”.

Sənəddə ”beynəlxalq hüququn prinsip və normaları” adı altında hansı prinsipin əsas götürüldüyü barədə sualı cavablandıran XİN sözçüsü ərazi bütövlüyünün nizamlamanın əsas prinsipi olduğunu vurğulayıb: “Helsinki Yekun Aktında millətlərin öz müqəddəratını təyinetmə hüququ da əksini tapıb, lakin həmin hüquq ərazi bütövlüyü çərçivəsində də reallaşdırıla bilər. Biz beynəlxalq hüququn heç bir prinsipini inkar etmirik və edə bilmərik. Ancaq beynəlxalq sənədlərdə və beynəlxalq hüquqda ərazi bütövlüyü prinsipi öz müqəddəratını təyinetmə hüququndan daha üstün tutulur”.

Danışıqlarda Dağlıq Qarabağın ətrafındakı 5 rayonun azad edilməsi və həmin zonaya Rusiya sülhməramlı qüvvələrinin yerləşdirilməsi məsələsinin müzakirə olunduğu barədə məlumatlara münasibət bildirən X. İbrahim deyib ki, bu mövzular danışıqların əsasını təşkil etmir: “Beynəlxalq qarantiyalar mərhələlərlə verilməlidir. Bu mərhələlər qoşunların çıxarılması və məcburi köçkünlərin öz doğma yurd-yuvalarına qayıtmasından ibarət olmalıdır”.

Dağlıq Qarabağın statusunun müəyyənləşdirilməsi üçün gələcəkdə referendum keçiriləcəyi barədə xəbərlərə toxunan diplomatın sözlərinə görə, əvvəlcə Azərbaycan icması Dağlıq Qarabağa qayıtmalıdır, status məsələsi isə daha sonra Azərbaycan sərhədləri çərçivəsində həll oluna bilər. Bəyannamənin tərəflər arasında etimadın yaradılması barədə bəndinə gəlincə, X. İbrahim hesab edir ki, qarşılıqlı etimadın yaradılması üçün məcburi köçkünlər öz evlərinə qayıtmalıdır: “Etimad yalnız icmalar arasında ola bilər. Onlar arasında ünsiyyət yoxdursa, hansısa digər mexanizmlər əbəsdir”.

Azərbaycan XİN-in təmsilçisi Moskva Bəyannaməsinin imzalanması ilə Türkiyənin regional təşəbbüsünün aktuallığını itirib-itirmədiyinə də toxunaraq bildirib ki, Türkiyənin təşəbbüsü ilə bu sənədi qarışdırmaq lazım deyil: “Türkiyənin təşəbbüsü Cənubi Qafqazda təhlükəsizlik və sabitlik haqqındadır. Bəyannamə isə sırf Ermənistan-Azərbaycan münaqişəsi ilə bağlıdır”.

Moskva_bəyannamə