Xarici siyasət

Ana səhifə

Xarici siyasət

Əli Həsənov: “ABŞ-Azərbaycan münasibətləri tərəfdaşlıq yönündə davam etdirilməlidir”

05 noyabr 2008 08:56 (UTC +04:00)

APA-nın məlumatına görə, bunu Prezident Aparatı ictimai-siyasi şöbəsinin müdiri Əli Həsənov deyib. Azərbaycan-ABŞ münasibətlərinin hər iki xalqın maraqları çərçivəsində olduğunu qeyd edən şöbə müdiri bu münasibətlərin tərəfdaşlıq yönündə davam etdirilməsinin vacibliyini önə çəkib: “Ölkəyə kimin rəhbərlik etməsindən asılı olmayaraq, xalqların seçimi əsasında qurulan siyasət davam etdirilməlidir. Əlbəttə, ən yaxşı prezident - xalqın seçdiyi prezidentdir. Amerika xalqı bu gün əgər Barak Obamanı seçibsə, onun gələcək fəaliyyətində də məhz xalqın istək və arzuları əksini tapacaq. Xalqın istək və arzularının onun fəaliyyətində əksini tapması isə Azərbaycan üçün xeyirdir, çünki Azərbaycanın dövlət maraqları Amerika xalqının maraqları ilə üst-üstə düşür”.

Hansısa diasporun təsiri ilə formalaşan, yürüdülən siyasətin əksər halda Amerika xalqının maraqlarına cavab vermədiyini deyən Ə. Həsənov konkret halda, erməni diasporunun Amerika hökumətini, onun siyasətini yönəltmək cəhdlərinin xalqın maraqları ilə üst üstə düşmədiyini vurğulayıb: “Ona görə də biz düşünürük ki, kimin prezident seçilməsindən asılı olmayaraq, Amerikada ümumi maraqlar, dövlət maraqları, milli maraqlar üstün tutulacaq. Bu siyasət isə Azərbaycanın maraqlarına cavab verir. Təəssüflər olsun ki, Amerikanın siyasəti təkcə Amerika xalqının istək və arzuları üzərində deyil, bəzən ayrı-ayrı diasporların təsiri altında formalaşır. Bu bizim dövlətlərin ümumi maraqlarına cavab vermir”.

Ə. Həsənov Azərbaycanın səmimi və həqiqi demokratiyanın inkişafına yönəlmiş istənilən təklifi, tövsiyəni normal qəbul etdiyini bildirib: “Amma biz təsir etmək, hansısa məsələdə təzyiq göstərmək məqsədilə irəli sürülmüş tövsiyələri, tələbləri birmənalı şəkildə qəbul etmirik. Azərbaycan özünün yürütdüyü səmimi siyasətə səmimi münasibət tələb edir. Amerika demokratları ilə Azərbaycan hakimiyyəti arasında əməkdaşlıq mövcuddur, davam edir və bundan sonrada davam edəcək. Azərbaycanın da, Amerikanın da milli maraqları tələb edir ki, bu iki dövlətin münasibətləri strateji tərəfdaşlıq istiqamətində inkişaf etsin”.

Qondarma “erməni soyqırımı” məsələsinə də toxunan şöbə müdiri olmayan bir şeyin kiminsə tərəfindən qəbul edilməsinin iflasa məhkum olduğunu vurğulayıb: “Əgər erməni soyqırımı olubsa, gec və ya tez tanınmalıdır. Yox, əgər olmayıbsa, kiminsə bunu tanıdığını elan etməsi heç nəyi dəyişmir. Tarix hər şeyi zamanında öz yerinə qoyur. Konkret halda “erməni soyqırımı” uydurma, cəfəngiyyat, reallığı əks etdirməyən xülyadır. Bunun tarixə salınması, tarixdə təsdiqlənməsi qeyri-mümkündür”.

ABŞ_seçki