Xarici siyasət

Ana səhifə

Xarici siyasət

Azərbaycanın milli təhlükəsizlik naziri Türkdilli Dövlətlərin Xüsusi Xidmət Orqanları Rəhbərləri Konfransının XI iclasında iştirak edib

08 noyabr 2008 14:01 (UTC +04:00)

Bakı-APA. Azərbaycanın milli təhlükəsizlik naziri, general-leytenant Eldar Mahmudov noyabrın 5-6-da Qazaxıstanın Astana şəhərində Türkdilli Dövlətlərin Xüsusi Xidmət Orqanları Rəhbərləri Konfransının XI iclasında iştirak edib. Milli Təhlükəsizlik Nazirliyinin İctimai Əlaqələr Mərkəzindən APA-ya verilən məlumata görə, tədbirdə Rusiya və Ukraynanın müvafiq qurumlarının yüksək vəzifəli nümayəndələri müşahidəçi qismində iştirak ediblər. Transmilli mütəşəkkil cinayətkarlıq, onun müxtəlif təzahürləri, xüsusən də getdikcə daha geniş miqyas və təhlükəli xarakter almaqda olan beynəlxalq terrorçuluq, ekstremizm, narkotiklərin qanunsuz dövriyyəsi ilə mübarizə sahəsində əməkdaşlığın yeni reallıqlara uyğun təkmilləşdirilməsi və inkişafı əsas müzakirə mövzuları olub.

Konfransda nazir E. Mahmudov «Türkdilli dövlətlər məkanında beynəlxalq terrorçu infrastrukturların fəaliyyətinin qarşısının alınması istiqamətində yeni nailiyyətlər» mövzusunda çıxış edib, terrorçuluq və dini ekstremizmlə mübarizənin Azərbaycanın qəti mövqeyi və ölkənin milli təhlükəsizlik orqanlarının prioritet vəzifəsi olmasını bir daha diqqətə çatdırıb. Nazir terrorçuluq fəaliyyəti ilə əlaqədar yeni təmayüllərin meydana çıxmasını, terrorçuların öz metod və taktikalarını rabitə, eləcə də konspirasiya vasitələrini və qaydalarını daim təkmilləşdirdiklərini vurğulayıb, bütün bunlarla əlaqədar konkret faktlar səsləndirib.

Daha sonra E. Mahmudov beynəlxalq nəqliyyat dəhlizləri və transmilli enerji şəbəkələrinin təhlükəsizliyinin təmin olunması işində diqqət yetirilməsi vacib olan əsas amillərdən danışıb, konfrans iştirakçısı olan dövlətlərin xüsusi xidmət orqanları arasında əməkdaşlığın effektivliyinin artırılması yollarına toxunub, bununla bağlı bir sıra təkliflər irəli sürüb.

Toxunulan məsələlər ətrafında geniş müzakirələr aparılıb.

Nazir Eldar Mahmudov tədbir çərçivəsində həmkarları ilə ikitərəfli görüşlər də keçirib.

Konfransın sonunda nümayəndə heyətlərinin rəhbərləri tərəfindən məlumat mübadiləsi və əməli əməkdaşlıq sahəsində xüsusi xidmət orqanlarının inteqrasiyası mexanizmlərinin təkmilləşdirilməsi istiqamətində məqsədyönlü tədbirlərin hazırlanması üzrə birgə kommunike imzalanıb.