Xarici siyasət

Ana səhifə

Xarici siyasət

Birləşmiş Krallığa miqrasiyaya nəzarət məqsədilə yeni sistem qüvvəyə minir

27 noyabr 2008 15:05 (UTC +04:00)

Bakı. Laçın Sultanova - APA. Bu gündən etibarən Birləşmiş Krallıqdan iş təklifi almış bütün yüksək ixtisaslı miqrantlar yeni sadələşdirilmiş, eyni zamanda daha etibarlı sistem vasitəsilə viza almaq üçün müraciət edə biləcəklər. Böyük Britaniyanın Azərbaycandakı səfirliyindən APA-ya verilən məlumata görə, Birləşmiş Krallığın Yeni Xal Əsaslı Sistem nəzdindəki Tier 2 çərçivəsində iş təklifi almış miqrantlar viza müraciət formasının bir hissəsi kimi gələcək iş təminatçısı tərəfindən maliyyələşdirilməli olacaqlar. Yeni sadələşdirilmiş müraciət prosesi iki mərhələli iş icazəsi sistemini əvəz edir və yüksək ixtisaslı işçilər üçün daha şəffaf şəkildə hazırlanıb.

Xal Əsaslı Sistem nəzdində yüksək ixtisaslı xarici vətəndaşlara keyfiyyət, öncəki gəlir, yaş və Birləşmiş Krallıq haqda təcrübəyə əsasən xallar veriləcək. Yalnız kifayət qədər xal torlaya bilən vətəndaşlar Birləşmiş Krallıqda işləmək üçün viza ala biləcəklər.

Tier 2 üçün müraciət edən vətəndaşlar viza üçün müraciət etməzdən əvvəl şirkətdən iş təklifini təqdim etməlidirlər. Britaniya əsilli şirkətlər həmin vakansiyanın vəzifənin icrasının yerli işçilər tərəfindən mümkün olmadığını və Birləşmiş Krallıqda həmin vakansiyaya qəbul elan olunduğunu göstərməlidir. Həmçinin iş təminatçıları yüksək ixtisaslı işçilərə iş təklif etmək üçün Birləşmiş Krallıq Sərhəd Agentliyindən lisenziya almalıdırlar.

Həmçinin bu gün Daxili İşlər Nazirliyi yeni Biznes Səfəri vizasını elan edib. Bu viza növündə Birləşmiş Krallığa biznes üçün səfər edənlərin səfər zamanı hansı fəaliyyətlərinə icazə verildiyi göstərilir. Yeni viza növündə səfər edən vətəndaşlar görüşlərdə iştirak edə, müqavilələr bağlaya, əlaqədar missiyalar icra edə və digər əlaqədar fəaliyyətlər həyata keçirə biləcəklər.

Bu gün, həmçinin, Birləşmiş Krallığa müvəqqəti səfər edənləri nəzərdə tutan Xal Əsaslı Sistem nəzdindəki Tier 5 ictimaiyyətə təqdim olunur. Bu xidmət növü idmançılar, müğənnilər və xeyriyyə işləri ilə məşğul olan vətəndaşları əhatə edir. Bu yeni viza Xüsusi Səfər vizası adlanır.

Bu il daha əvvəl qüvvəyə minən və iş təklifi olmadan Birləşmiş Krallıqda işləmək istəyən yüksək ixtisaslı işçilər üçün nəzərdə tutulan Tier 1-in icrasından sonra Xal Əsaslı Sistem nəzdində Tier 2 və Tier 5 təqdim edilib. Tələbələr üçün nəzərdə tutulan Tier 4 isə növbəti ilin aprel ayından tətbiq olunacaq.