Xarici siyasət

Ana səhifə

Xarici siyasət

Deputat: Azərbaycan qlobal gündəmin formalaşmasında iştirak edən ölkəyə çevrilib

Tahir Mirkişili, Milli Məclisin deputatı

16 oktyabr 2025 13:00 (UTC +04:00)

Dörd sammitdə iştirak Azərbaycanın qlobal gündəmin formalaşmasında iştirak edən ölkəyə çevrildiyinin sübutudur.
Bunu APA-ya açıqlamasında Milli Məclisin deputatı Tahir Mirkişili bildirib.
Deputat deyib ki, 2025-ci ilin oktyabr ayı Azərbaycanın beynəlxalq arenada keçirdiyi transformasiyanın bariz sübutuna çevrilib: “Prezident İlham Əliyevin bir ay ərzində dörd fərqli coğrafiyada - Kopenhagendən Qəbələyə, Düşənbədən Şərm əl-Şeyxə qədər keçirilən zirvə görüşlərində iştirakı və orda keçirdiyi görüşlər ölkənin artıq qlobal məsələlərin müzakirə masasında söz sahibinə çevrildiyini təsdiqləyir. Azərbaycanın diplomatik fəallığı təsadüfi deyil. Ölkə eyni vaxtda bir neçə istiqamətdə aktiv xarici siyasət aparır: Avropa Siyasi Birliyinin Kopenhagen sammitində Qərblə əlaqələr, Qəbələdə Türk Dövlətləri Təşkilatı çərçivəsində regional inteqrasiya, Düşənbədə MDB platformasında postsovet məkanında mövqelərin əlaqələndirilməsi və Şərm əl-Şeyxdə Yaxın Şərq sülh prosesində vasitəçilik missiyası. Bu çoxtərəfli iştirak Azərbaycanın artıq tək regional oyunçu deyil, qlobal proseslərə təsir göstərə bilən dövlətə çevrildiyini göstərir. Makron, Putin və Avropa İttifaqı liderləri ilə görüşlər isə Bakının həm Qərb, həm də Şərq arasında konstruktiv dialoq qura bilən nadir dövlətlərdən biri olduğunu təsdiqləyir”.
Tahir Mirkişili qeyd edib ki, Azərbaycanın Şərm əl-Şeyx sammitində iştirakı xüsusilə əhəmiyyətlidir: “Ölkənin həm ABŞ, həm ərəb dünyası, həm də İsraillə eyni vaxtda konstruktiv münasibətlər qura bilməsi onu Yaxın Şərq konfliktində unikal vasitəçi mövqeyinə yüksəldib. Bu, müsəlman ölkəsi olub həm İsraillə konstruktiv əməkdaşlıq quran, həm də eyni zamanda ərəb dünyasında hörmət qazanmış az sayda dövlətin nümunəsidir. Azərbaycanın qlobal nüfuzunun artmasında enerji təhlükəsizliyi və nəqliyyat dəhlizləri mühüm rol oynayır. Avropa üçün alternativ enerji mənbəyi, Çin üçün Orta Dəhliz layihəsinin açar elementi, Rusiya və İran üçün isə regional əməkdaşlıq tərəfdaşı olan ölkə olaraq hamı üçün əvəzolunmazdır.
Azərbaycanın diplomatik strategiyasının əsas xüsusiyyəti heç kəsə qarşı olmayıb, hamı ilə dialoq qurmaq prinsipidir. Bu, xüsusilə qütbləşmənin dərinləşdiyi müasir dünyada unikal keyfiyyətə çevrilib. Ölkə nə Qərb-Rusiya qarşıdurmаsında kəskin tərəf seçir, nə də regional konfliktlərdə birtərəfli mövqe tutur. Bu, dünyada məsuliyyətli liderliyin bariz nümunəsidir. Beləliklə, dörd sammitdə iştirak yalnız rəqəmlər deyil - bu, Azərbaycanın artıq qlobal gündəmin formalaşmasında iştirak edən, böyük dövlətlər arasında etimad qazanmış və regional prosesləri istiqamətləndirə bilən ölkəyə çevrildiyinin sübutudur. Geosiyasi rəqabətin kəskinləşdiyi, yeni qlobal nizamın formalaşdığı bir dövrdə Azərbaycan özünə güvənən konstruktiv güc mərkəzi kimi güclənir və bu tendensiya gələcəkdə daha da sürətlənəcək”.